Адлічэньні са зборнай краіны і клюбу — у спорце два новыя выпадкі рэпрэсій

Футбалістка берасьцейскага «Дынама» Вікторыя Сідарчук, якая ў канцы траўня выказала свой пратэст пасьля гісторыі з захопам самалёта і арыштам Рамана Пратасевіча і Соф’і Сапегі, пакінула клюб. На адным з матчаў пасьля таго здарэньня Сідарчук адвярнулася ад чырвона-зялёнага сьцяга падчас прайграваньня гімну. Паводле інфармацыі «Трыбуны», за такі дэмарш спартсмэнку адлічылі з каманды.

Наступствы такога рашэньня адбіліся на «Дынама» адразу ж — перад матчам чвэрцьфіналу Кубку Беларусі высьветлілася, што берасьцейкі нават не набіраюць поўнага стартавага складу. На поле каманда выйшла ўдзесяцёх і прагуляла магілёўскаму «Дняпру» з разгромным лікам 0:11.

Таксама пад рэпрэсіі трапіла дасьведчаная спартсмэнка, удзельніца дзясяткаў міжнародных і нацыянальных змаганьняў у лёгкай атлетыцы Сьвятлана Кудзеліч. Кудзеліч раней падпісалася за новыя выбары і супраць гвалту, у траўні яе выключылі са зборнай Беларусі, пра што яна цяпер распавяла журналістам.

Сьвятлана правяла паўгода ў Кеніі, дзе рыхтавалася да маратону ў Капэнгагене. Аднак важны старт у Даніі адмянілі праз каранавірус, і ў выніку Кудзеліч амаль пазбавілася шанцаў здабыць алімпійскую ліцэнзію. Аднак нават у выпадку яе заваяваньня яна не прадстаўляла б Беларусь, бо выключаная з нацыянальнай каманды.

Муж і трэнэр Кудзеліч Ігар Жаваранак сказаў, што рашэньне пра выключэньне Сьвятланы са зборнай кіраўнікі прынялі яшчэ 5 траўня, але паведамілі пра гэта амаль празь месяц. А цяпер сталі пазьбягаць любых сустрэч са Сьвятланай і яе трэнэрам.

«Калі да ўлады прыйдуць нармальныя людзі, усё зьменіцца — і Сьвета будзе выступаць за Беларусь. Выступаць ж за „Беларусію“ асаблівага жаданьня няма. Тым больш цяпер ёсьць варыянты быць нэўтральным атлетам. У Міжнародным алімпійскім камітэце і ІААФ (Міжнародная фэдэрацыя лёгкай атлетыкі) ёсьць паняцьце „рэпрэсаваны спартовец“. І ніхто не забароніць атлету, які мае выкананы нарматыў, удзельнічаць у Алімпіядзе, да прыкладу. Усё магчыма», — сказаў Жаваранак.

Пры гэтым сама Кудзеліч прызналася, што шанцаў трапіць на Гульні ў Токіа пасьля адмены маратону ў Даніі ў яе амаль не засталося, і цяпер яна настройваецца на Алімпіяду-2024.

Яшчэ адну падпісантку ліста за новыя выбары ў краіне Вольгу Мазуронак рэпрэсіі пакуль не закранулі — яна працягвае рыхтавацца да Алімпійскіх гульняў у Токіа.