Цырымонія прайшла 16 траўня ў онлайн-фармаце. Калесьнікаву, якая знаходзіцца ў зьняволеньні, прадстаўляла яе сястра Тацяна Хоміч.
Напярэдадні стала вядома, што Сьвятлана Ціханоўская, Марыя Калесьнікава і Вераніка Цапкала ўзнагароджаныя нямецкай прэміяй імя Льва Копелева
«Сваёй рашучасьцю і мужнасьцю яны запусьцілі дэмакратычны рух, які ахапіў усю Беларусь», — адзначыў падчас цырымоніі прэм’ер-міністар зямлі Паўночны Рэйн–Вэстфалія, лідэр кіроўнай у Нямеччыне партыі ХДС Армін Лашэт.
«Гэта вялікі гонар для Марыі і ўсяго беларускага народу, — заявіла Тацяна Хоміч. — Вялікі дзякуй за тое, што вы падтрымліваеце нас у нашай барацьбе за свабоду, справядлівасьць, нашыя правы. Тысячы беларусаў прайшлі праз турмы, сотні людзей былі зьбітыя, кожны дзень палітвязьня — гэта катаваньне. Беларусаў пазбаўляюць свабоды, але яны не могуць пазбавіць беларусаў волі».
ГЛЯДЗІЦЕ ТАКСАМА: Сястра Калесьнікавай атрымала за Марыю ў Штутгарце нямецкую прэмію ў галіне правоў чалавека- Прэмія заснаваная ў 2001 годзе Форумам імя Льва Копелева. Лёў Копелеў — літаратуразнаўца, дысыдэнт, праваабаронца, які ў 1981 годзе быў пазбаўлены савецкага грамадзянства «за дзеяньні, якія ганяць высокае званьне грамадзяніна СССР».
- Ціханоўская, Калесьнікава і Цапкала былі сярод ляўрэатаў прэміі Эўрапарлямэнту імя Андрэя Сахарава за 2020 год.
- Калесьнікава абвінавачваецца беларускімі ўладамі па трох артыкулах Крымінальнага кодэксу, ёй пагражае да 12 гадоў пазбаўленьня волі.
- Ціханоўская ўключаная ў сьпіс асобаў, датычных, на думку КДБ, да тэрарыстычнай дзейнасьці, яна абвешчаная ў міжнародны вышук.