Славенія будзе «цьвёрда падтрымліваць усе намаганьні, накіраваныя на ўмацаваньне дэмакратызацыі, павагі да вяршэнства закону і правоў чалавека ў Беларусі», заявіў прэмʼер-міністар краіны Янэз Янша 3 траўня ў Любляне на сустрэчы зь Сьвятланай Ціханоўскай, перадае БелаПАН.
Паводле інфармацыі прэс-службы ўраду Славеніі, бакі «абмяняліся думкамі пра сытуацыю ў Беларусі».
Ціханоўская апавяла пра палітычна матываваныя крымінальныя справы і рэпрэсіі, палітычных зьняволеных. Яна заклікала падтрымаць міжнародную плятформу для збору доказаў парушэньняў правоў чалавека ў Беларусі, якая пачала сваю працу; магчымыя праграмы супрацоўніцтва для спэцыялістаў IT-сэктару і рэпрэсаваных дзеячаў культуры, адзначылі ў яе прэс-службе.
«Абмеркавалі фармат удзелу Беларусі ў саміце „Усходняга партнэрства“, які пройдзе восеньню гэтага года. Пастаўлена пытаньне аб тым, што там абавязкова мусіць прысутнічаць Сьвятлана Ціханоўская і прадстаўнікі грамадзянскай супольнасьці Беларусі. Ціханоўская падкрэсьліла, што саміт павінен прайсьці без удзелу Лукашэнкі», — адзначаецца ў рэлізе.
Таксама Сьвятлана Ціханоўская сустрэлася зь міністрам замежных спраў Славеніі Анжэ Логарам. «Сустрэча важная, таму што з 1 ліпеня 2021 году Славенія будзе старшынстваваць у Эўразьвязе», — падкрэсьліла прэс-служба Ціханоўскай.
ГЛЯДЗІЦЕ ТАКСАМА: Прадстаўнік Ціханоўскай разам з амбасадарамі Літвы і Польшчы адкрылі ў Празе выставу пра Канстытуцыю 3 траўня. ФОТА ГЛЯДЗІЦЕ ТАКСАМА: Прэзыдэнт Літвы: Гістарычна блізкія народы Беларусі і Ўкраіны маюць адчуць асалоду ад свабоды, незалежнасьці і дэмакратыі ГЛЯДЗІЦЕ ТАКСАМА: Латушка абвясьціў пра новую акцыю пратэсту