Суды і выракі 23 красавіка: год «хатняй хіміі» за абразу Лукашэнкі, 2 і 1,5 года «хіміі» за абразы міліцыянтаў у Воршы і Ельску

У судзе Першамайскага раёну Менску 23 красавіка вынесены прысуд у крымінальнай справе, заведзенай на 30-гадовую Вольгу Насыр. Яе абвінавачваюць у публічнай абразе Лукашэнкі (частка 1 артыкулу 368 Крымінальнага кодэксу).

Судзьдзя Максім Трусевіч вынес прысуд адпаведна просьбе пракурора Ганны Лапянок — адзін год «хатняй хіміі».

Вольга Насыр у Першамайскім раённым судзе.

Да суду жанчына знаходзілася пад падпіскай аб нявыезьдзе. Раней яна брала ўдзел у масавай акцыі 23 студзеня і была затрыманая на 3 сутак.

Згодна з матэрыяламі справы, Вольга Насыр у адным з Telegram-каналаў разьмясьціла выказваньні ў адрас Лукашэнкі з выкарыстаньнем ненарматыўнай лексыкі. Гэтая інфармацыя стала даступная неабмежаванаму колу карыстальнікаў сеціва. Сярод іншага назвала яго «вусатым тараканам».

Пасьля вывучэньня матэрыялаў справы на яе завялі справу паводле ч. 1 арт. 368 Крымінальнага кодэксу Рэспублікі Беларусь.

Вольга разведзеная, мае дзіця 9 гадоў. Раней да крымінальнай адказнасьці не прыцягвалася. Віну прызнала цалкам, ва ўчыненым раскайваецца, кажа, што трэба было стрымаць эмоцыі.

1,5 года «хіміі» за абразу начальніка Дзяржынскага РАУС

Суд Ельскага раёну Гомельскай вобласьці вынес прысуд у крымінальнай справе аб «абразе прадстаўніка ўлады ў сувязі з выкананьнем ёй службовых абавязкаў» (арт.369 КК), паведамілі ў Вярхоўным судзе.

Судзілі 56-гадовага жыхара Ельску Аляксандра Бычкоўскага. Паводле абвінавачаньня, «у канцы верасьня 2020 году ў адной з сацыяльных сетак ён прагледзеў камэнтар, пакінуты пад раней разьмешчанай неўсталяванай асобай фатаграфіяй і асабістымі дадзенымі начальніка Дзяржынскага РАУС Менскай вобласьці Яўгена Жылінскага. Затым пакінуў і свой камэнтар, які зьмяшчае абразы ў адрас апошняга».

Мужчыну прызналі вінаватым і асудзілі на 1,5 года абмежаваньня волі з накіраваньнем у папраўчую ўстанову адкрытага тыпу — «хімію». Таксама на карысьць пацярпелага абвінавачаны мусіць выплаціць 1 500 рублёў кампэнсацыі за маральную шкоду. Прысуд яшчэ можна апратэставаць.

2 гады «хіміі» бацьку чатырох дзяцей за абразу міліцыянта ў закрытым чаце

У Воршы вынесьлі прысуд Максіму Шаўлінскаму — яго абвінавацілі ў паклёпе на міліцыянта. Пасьля выбараў у працоўным чаце адной гандлёвай кампаніі людзі абмяркоўвалі падзеі ў краіне. Нехта скінуў фатаздымак міліцыянта Дзьмітрыя Вішнеўскага. Работнікі ў запале тых падзеяў нэгатыўна выказаліся і пра самога міліцыянта і пра тое, што адбывалася, піша orsha.eu.

Спачатку асудзілі іншага супрацоўніка дадзенай гандлёвай кампаніі — Арцёма Кандрацьева, яго адправілі на 1,5 года «хіміі». Пасьля пачалі разглядаць абвінавачаньне супраць Максіма Шаўлінскага, якога ў выніку асудзілі на 2 гады «хіміі». Судзьдзя — Мікалай Драгуноў.

Вішнеўскага суд прызнаў пацярпелым, нягледзячы на тое, што ўсё адбывалася ў закрытым чаце, а не публічным. Шаўлінскі цяпер мусіць выплаціць міліцыянту 1 000 рублёў маральнай кампэнсацыі. Максім выхоўвае чатырох дзяцей: двое ад першага шлюбу жонкі і двое сваіх, малодшай дачцэ яшчэ ня споўнілася двух месяцаў.

Менскі гарадзкі суд пакінуў вырак журналісткам Андрэевай і Чульцовай бязь зьменаў

Журналістак «Белсату» асудзілі на 2 гады пазбаўленьня волі кожную. Цяпер яны знаходзяцца ў СІЗА ў Жодзіне.

23 красавіка Менскі гарадзкі суд разгледзеў апэляцыйную скаргу на прысуд Дар’і Чульцовай і Кацярыне Андрэевай (Бахвалавай), журналісткам тэлеканалу «Белсат». Пад вартай журналісткі знаходзяцца ўжо больш за 5 месяцаў.

Самі асуджаныя ў працэсе аб сваёй апэляцыі ня ўдзельнічалі. Адвакаты Кацярыны Андрэевай і Дар'і Чульцовай падалі хадайніцтва, каб яны удзельнічалі ў працэсе праз відэасувязь. Суддзя адхіліла, сказала, што хадайніцтва разглядалі, але пакінулі без задавальнення.

У Гомлі абласны суд пакінуў бязь зьменаў прысуд 16-гадоваму падлетку з эпілепсіяй — 5 гадоў калёніі

Гомельскі абласны суд 23 красавіка разгледзеў скаргі асуджаных да вялікіх тэрмінаў жыхароў Гомля, раёну і Добрушу за «масавыя беспарадкі» і пакінуў прысуды бязь зьменаў, а скаргі — без задавальненьня.

Сярод асуджаных — 16-гадовы Мікіта Залатароў, хворы на эпілепсію. Ён пакараны калёніяй на 5 гадоў.