Улады Кітая аштрафавалі карпарацыю Alibaba на 2,8 мільярда даляраў. Улады заявілі, што карпарацыя Alibaba прымушае прадаўцоў гандляваць толькі на адной плятформе. Гэта самы буйны штраф у гісторыі краіны.
Праблемы ў заснавальніка кампаніі Джэка Ма пачаліся пасьля таго, як у кастрычніку ён публічна раскрытыкаваў чыноўнікаў.
Ён абвінаваціў іх у цяганіне і заявіў, што рэгуляцыйныя меры, «прыдуманыя дзядамі», не адпавядаюць часу.
Гэтая крытыка прагучала акурат пасьля прамовы намесьніка старшыні КНР, 72-гадовага Ван Цішаня, які казаў пра небясьпеку пашырэньня новых фінансавых тэхналёгій для эканамічнай стабільнасьці.
Джэк Ма лічыўся самым багатым чалавекам у Кітаі. Ягоную маёмасьць ацэньвалі ў больш як 65 мільярдаў даляраў. Але з восені ацэнка яго актываў зьнізілася на 15 адсоткаў. Цяпер ён толькі чацьвёрты ў сьпісе найбагацейшых кітайцаў.
ГЛЯДЗІЦЕ ТАКСАМА: «ІТ-галіна ў Беларусі паводле ўнёску ў ВУП стала ўпоравень з аграрнай», — віцэ-прэм’ер Турчын ГЛЯДЗІЦЕ ТАКСАМА: Кітайская пляцоўка AliExpress — абсалютны лідэр гандлю ў беларускай інтэрнэт-прасторы