У Менску 5 красавіка затрымалі 31-гадовага мужчыну, у якога знайшлі розных наркотыкаў на больш як мільён даляраў, паведаміў Сьледчы камітэт. Паводле сьледчых, ён збываў наркотыкі для інтэрнэт-крамы.
На наступны дзень затрымалі яшчэ 4 жанчын і 3 мужчын у веку ад 19 да 33 гадоў — іх падазраюць у распаўсюдзе наркотыкаў.
Як вынікае з паведамленьня, пачалася гісторыя з затрыманьня ў лютым двух 17-гадовых хлопцаў. Яны цягам чатырох месяцаў прадавалі наркотыкі праз інтэрнэт і самі рабілі закладкі, лічаць сьледчыя.
Што знайшлі ў збытчыка
- сама меней 15 кг мэфэдрону
- ня менш за 5 кг амфэтаміну
- сама меней 13 000 таблетак з MDMA
- ня менш за 5 кг гашышу
- ня менш за 300 г какаіну
- ня менш за 15 г марыхуаны
Пакараньне за наркатычныя злачынствы ў Беларусі. Што важна ведаць
- У красавіку-траўні 2018 года актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе.
- Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкула (ад 5 да 25 гадоў пазбаўленьня волі), а таксама зьменаў у заканадаўства.
- «Маці 328» лічаць, што ў некаторых выпадках тэрміны зьняволеньня несувымерныя злачынству, а закон недастаткова ўлічвае асобы злачынцаў, іх узрост ды іншыя акалічнасьці.
- 13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады. У ліпені Лукашэнка падпісаў закон аб зьмене КК.