15 сутак за налепкі на таемным судзе, 10 сутак за ўзьняты кулак — адміністрацыйныя прысуды 2 красавіка

10 сутак мужчыну, якому зламалі руку пасьля затрыманьня

Пасьля «хапуна» 27 сакавіка каля ГЦ «Рыга» ў Менску Ільлю Басюку зламалі руку, зьмясьцілі яго ў карцар на трое сутак, а затым асудзілі на 10 сутак. У Партызанскім РУУСе на яго склалі два пратаколы: за «пікетаваньне шляхам узьняцьця кулака ўверх» і за «непадпарадкаваньне пры затрыманьні», піша тэлеграм-канал «„Вясна“ назірае».

На першым судзе 30 сакавіка сьведка-міліцыянт у адказ на пытаньне адвакаткі Басюка сказаў, што раней ужо бачыў, як узьняты кулак падахвочваў іншых да ўдзелу ў акцыях. Але тады міліцыянт часта паўтараў «я проста пераблытаў час», і судзьдзя Міхаіл Макарэвіч накіраваў справу Ільлі на дапрацоўку. Пры гэтым у рапарце апытаньня сьведак нават не было іх асабістага подпісу, што наўпрост парушае заканадаўства.

На відэа, прадастаўленым адвакаткай, бачна, што Ільля пайшоў у аўтобус да сілавікоў добраахвотна і ягоная рука была здаровая.

Каб не выпускаць па заканчэньні 72-гадзіннага тэрміну, на Ільлю склалі новы пратакол па арт. 24.3 КаАП — нібыта за тое, што ён «у падвале РУУСу выхапіў блянк апытаньня і хацеў унесьці туды запісы без дазволу».

На судзе Басюк заявіў, што яго білі ў ІЧУ і зламалі руку. Пасьля таго ён адчувае сябе вельмі дрэнна: яго ванітуе, кружыцца галава і баліць зламаная рука. Мэдычнай дапамогі яму не аказалі, а далі толькі таблетку і бінт. Мужчына праседзеў у карцары са зламанай рукой трое сутак без матраца і пасьцельнай бялізны.

2 красавіка судзьдзя Макарэвіч пакараў Басюка па апошнім пратаколе 10-суткавым арыштам.

15 сутак за налепкі

Раніцай 2 красавіка затрымалі 21-гадовую студэнтку Віялету Ашмян, калі яна ішла на заняткі ва ўнівэрсытэт. Пры сабе ў яе былі налепкі. Дзяўчыну даставілі ў РУУС Цэнтральнага раёну Менску, дзе склалі на яе пратакол па ч.1 арт. 24.23 КаАП нібыта за пікетаваньне з дапамогай налепак.

Міліцыянты адмовіліся паведамляць хоць нешта маці дзяўчыны. Пазьней высьветлілася, што Віялету ўжо асудзілі на 15 сутак, суд прайшоў таемна.