Адміністратар тэлеграм-каналу «Беларусь головного мозга» і кансультант Радыё Свабода Ігар Лосік за кратамі ўжо 244 дні — з 25 чэрвеня 2020 году. За ўвесь гэты час ён быў на допытах усяго лічаныя разы. Па словах самога палітвязьня, яго проста трымаюць за кратамі безь якіх-небудзь сьледчых дзеяньняў.
«Па справе ў Ігара няма ніякіх зрухаў, — расказала Свабодзе жонка Ігара Лосіка Дар’я, якая адвезла мужу чарговую перадачу ў аўторак 23 лютага. — Абсалютна ніякай інфармацыі. Допыты і сьледчыя дзеяньні зь Ігарам праводзіліся ўсяго некалькі разоў за ўвесь гэты час. Не сказаць, каб іх было шмат. Ад самага пачатку Ігар проста сядзеў, і ўсё. Фактычна бязь нейкага сьледзтва».
Дар'я Лосік, жонка палітвязьня Ігара Лосіка, пасьля наведваньня жодзінскага СІЗА.
Па словах жонкі, на здароўе Ігар цяпер ня скардзіцца. Нядаўна атрымаў адразу больш за 60 лістоў, у тым ліку 4 ад жонкі. Раней Ігар перадаваў, што ў камэры зьявіліся вошы. Гэтую праблему ўдалося вырашыць самастойна: Ігар разам з сукамэрнікамі перамылі адзеньне хлёркай.
Лісты ад Ігара Лосіка з СІЗА.
«Па-мойму, апошні раз Ігар бачыў сьледчага 15 сьнежня 2020 году, калі яму прад’явілі новыя абвінавачаньні і калі ён абвясьціў галадоўку. Больш нічога не было. Ні допытаў, ні вочных ставак. Ігар вельмі злуецца праз гэта. Ён стаміўся сядзець, сядзець проста так. Ігар кажа, што проста стаміўся. Ён цяпер у такім досыць невясёлым стане. Кажа, што ўсё спынілася, няма ніякага руху. Хай бы ўжо хоць нешта адбывалася».
Дар’я дадае, што, на яе думку, сьледчыя самі ня ведаюць, што рабіць зь Ігарам. Па яе словах, тэрмін утрыманьня Ігара Лосіка пад вартай павінен скончыцца ў канцы сакавіка. Ці будзе ён працягнуты зноў, альбо Ігара Лосіка выпусьцяць з-пад варты, таксама невядома.
Хто з палітвязьняў за кратамі без суду даўжэй, чым Ігар Лосік
Сяргей Ціханоўскі — 270 дзён
Сяргей Ціханоўскі.
Ціханоўскага затрымалі 29 траўня ў Горадні. Празь некалькі дзён яго абвінавацілі па артыкуле 342 Крымінальнага кодэксу — «арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх», а таксама па 191-м — «перашкода ажыцьцяўленьню выбарчых правоў». Суд па справе Сяргея Ціханоўскага дагэтуль не пачаўся, яго ўтрымліваюць у сьледчай турме № 8 у Жодзіне.
Аляксандар Арановіч — 270 дзён
Аляксандар Арановіч.
Паплечнік Сяргея Ціханоўскага, таксама быў затрыманы 29 траўня 2020 году ў Горадні. Абвінавачаны ва ўдзеле ў масавых беспарадках па 342-м артыкуле, а таксама ў арганізацыі і падрыхтоўцы дзеяньняў, якія груба парушаюць грамадзкі парадак. Арановіча трымаюць у СІЗА на вуліцы Валадарскага ў Менску.
Мікола Статкевіч — 269 дзён
Мікола Стакевіч.
Быў затрыманы па дарозе на пікет ля Камароўскага рынку ў Менску. Першапачаткова адбываў адміністрацыйны арышт за ўдзел у несанкцыянаваным мерапрыемстве, аднак празь месяц пасьля затрыманьня Статкевічу прад’явілі абвінавачаньні ва ўдзеле ў масавых беспарадках, а таксама ў арганізацыі і падрыхтоўцы дзеяньняў, якія груба парушаюць грамадзкі парадак. Знаходзіцца ў сьледчай турме ў Жодзіне. Пра пачатак працэсу над Статкевічам нічога невядома.
Арцём Сакаў — 268 дзён
Арцём Сакаў.
Апэратар Сяргея Ціханоўскага быў затрыманы ў сваёй кватэры праз тыдзень пасьля інцыдэнту ў Горадні. Абвінавачаны ў арганізацыі і падрыхтоўцы дзеяньняў, якія груба парушаюць грамадзкі парадак, альбо актыўным удзеле ў іх. Утрымліваецца ў СІЗА № 1 на вуліцы Валадарскага ў Менску.
Дзьмітрый Папоў — 265 дзён
Палітвязень Андрэй Папоў.
Вёў акаўнты «Краіны для жыцьця» ў сацсетках, грамадзянін Расеі. Зьнік 4 чэрвеня 2020 году, 7 чэрвеня быў затрыманы ля Мазыра і дастаўлены ў Менск спачатку ў ізалятар на Акрэсьціна, а пазьней у СІЗА № 1, дзе знаходзіцца дагэтуль. Абвінавачаны ў арганізацыі і падрыхтоўцы дзеяньняў, якія груба парушаюць грамадзкі парадак.
Аляксандр Шабалін — 265 дзён
Сябра ініцыятыўнай групы Сьвятланы Ціханоўскай, быў затрыманы раніцай 7 жніўня 2020 году ў Гомлі, калі зьбіраўся ехаць на пікет па зборы подпісаў за Ціханоўскую. Абвінавачаны ў арганізацыі масавых беспарадкаў, знаходзіцца ў СІЗА № 1.
Павал Севярынец — 265 дзён
Павел Севярынец.
Затрыманы 7 чэрвеня 2020 году ля свайго дому, калі вяртаўся зь пікету на Камароўцы. Абвінавачаны ў арганізацыі масавых беспарадкаў, знаходзіцца ў СІЗА на вуліцы Валадарскага. Пра ход сьледзтва і магчымы пачатак суду па справе Севярынца нічога невядома.
Уладзімер Цыгановіч — 263 дні
Блогер Уладзімер Цыгановіч.
Аўтар ютуб-канала MozgON, затрыманы 9 чэрвеня 2020 году. Спачатку адбыў два адміністрацыйныя тэрміны па 15 сутак, потым яму прад’явілі абвінавачаньні ў арганізацыі і падрыхтоўцы дзеяньняў, якія груба парушаюць грамадзкі парадак. Знаходзіцца ў СІЗА № 1.
Зьміцер Казлоў — 262 дні
Зьміцер Казлоў.
Аўтар ютуб-канала «Шэры кот». Пасьля затрыманьня 10 чэрвеня 2020 году адбыў адміністрацыйны арышт працягласьцю 20 дзён, пасьля быў абвінавачаны ў арганізацыі і падрыхтоўцы дзеяньняў, якія груба парушаюць грамадзкі парадак. Трымаюць Зьмітра Казлова ў СІЗА на Валадарскага ў Менску.
Уладзімер Дудараў — 261 дзень
Сябра ініцыятыўнай групы Віктара Бабарыкі, былы намесьнік кіраўніка магілёўскага гарвыканкаму. Утрымліваецца ў турме № 4 Магілёва.
Сяргей Спарыш — 244 дні
Паплечнік Міколы Статкевіча, быў затрыманы ў адзін дзень зь Ігарам Лосікам — 25 чэрвеня 2020 году. 9 ліпеня Спарышу прад’явілі абвінавачваньні па артыкуле 342 КК — «групавыя дзеяньні, якія груба парушаюць грамадзкі парадак». Знаходзіцца ў СІЗА № 1 у Менску.
Сяргей Спарыш.
ГЛЯДЗІЦЕ ТАКСАМА: «Мы вернемся, калі...» Гісторыі актывістаў, якія зьехалі зь Беларусі празь перасьлед ГЛЯДЗІЦЕ ТАКСАМА: 6 месяцаў за кратамі. Як маюцца палітвязьні са «справы Ціханоўскага»Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.