Жыхарку Гомля Анастасію Перавошчыкаву суд пакараў 15 днямі арышту паводле артыкулу 23.34. Дзяўчына выйшла з ізалятару 6 лютага. Як Свабодзе расказалі валянтэры, 9 лютага суд зноў пакараў яе арыштам на 15 дзён.
Першыя «суткі» дзяўчына атрымала пасьля таго, як дома ў яе і блізкіх (маці, дзеда) прайшоў ператрус. Тады Анастасію суд пакараў нібыта за акцыю са сьцягам. Яна адбывала пакараньне ў ізалятары Буда-Кашалёва. Пасьля вызваленьня дзяўчыну зноў затрымалі і 9 лютага даставілі ў суд.
«Міліцыя сказала, што на яе ёсьць яшчэ дзесяць эпізодаў, і таму яе будуць зноў затрымліваць і судзіць. Суд грунтаваўся на паказаньнях яе „сяброў“, больш ніякіх доказаў „злачыннасьці“ не было», — зазначылі валянтэры.
ГЛЯДЗІЦЕ ТАКСАМА: Студэнт Салановіч, які недаадбыў 114 дзён арышту, зьехаў зь БеларусіМіліцыя Гомля праяўляе пільную ўвагу да жыхароў Навабеліцкага раёну. Некаторыя актывісты, якія траплялі пад перасьлед, ужо зьехалі за мяжу.
9 лютага прайшоў ператрус у валянтэркі, маці пяці дзяцей Тацьцяны Максімавай.
«Спачатку яны шукалі нейкую „Бэстыю“, пыталіся, ці ведаю я яе. Потым перавярнулі ўсю хату, забралі тэлефоны, 99 дыскаў — у асноўным з музыкай і мультфільмамі. Забралі чатыры мае дыскі з вынікамі МРТ (магнітна-рэзанаснай тамаграфіі. — РС), забралі паштоўкі. Мяне папікалі, чаму я дапамагаю як валянтэрка толькі „палітычным“? Але папраўдзе я дапамагаю ўсім, хто мае ў гэтым патрэбу», — пракамэнтавала Тацяна Максімава.
9 лютага ператрус прайшоў і ў жыхара Гомля Руслана Сасыкбаева.
«Мне патлумачылі, што нібыта на тэлеграм-канале „Флагшток“ зьявіліся нейкія здымкі некага зь бел-чырвона-белым сьцягам. У мяне забралі стары ноўтбук, тэлефон. І затрымалі Насту, якая была ў нас дома. Яе падазраюць у адміністраваньні нейкага тэлеграм-чату», — расказаў Руслан Сасыкбаеў.
Ад міліцэйскага перасьледу ўвосень была вымушана зьехаць за мяжу жонка Руслана, валянтэрка Наста Сасыкбаева.
ГЛЯДЗІЦЕ ТАКСАМА: Жнівень 2020 – люты 2021. Мы сьведкі. „Паглядзела яго картку і ўбачыла месца працы — АМАП“. АБНАЎЛЯЕЦЦА ГЛЯДЗІЦЕ ТАКСАМА: «Лёгкім бывае толькі шлях у рабства». Віктар Бабарыка даў інтэрвію з-за кратаў