У Наваградку жанчыну асудзілі за пікет, бо на вопратцы мела зорку зь лічбамі 23.34

Як расказала Жанна Баброўская, яна прыйшла 24 студзеня на экскурсію, прысьвечаную дню памяці Галакосту, як удзельніца, ня гід. Усім удзельнікам, якія аплацілі экскурсію, прышпілілі зоркі з надпісам «23.34». Усяго было больш за 20 чалавек. Падчас экскурсіі ўдзельнікаў традыцыйна суправаджалі міліцыянты. Тады Жанну не затрымлівалі.

«Камбінацыя лічбаў у нас нібыта яшчэ не забароненая. Яна можа асацыявацца з чым заўгодна. Гэта тэлефонны код Жлобіна, у некага гэта касавы чэк, у некага — артыкул Адміністрацыйнага кодэксу», — камэнтуе лічбы на зорках жанчына.

Яна сама прыйшла ў міліцыю 27 студзеня па іншай справе. 1 студзеня яна выйшла пагуляць на гарадзкую плошчу пасьля самаізаляцыі з прычыны каранавірусу. Міліцыянт, які ведаў, што яна хварэла, сказаў гучна, так, што чулі іншыя: «Гэта тая, у якой страшны COVID». Баброўская напісала заяву на супрацоўніка міліцыі за тое, што незаконна распаўсюдзіў зьвесткі пра ейны стан здароўя. Калі яна прыйшла ў міліцыю па позьве наконт гэтага выпадку, на яе склалі пратакол за ўдзел у недазволеным масавым мерапрыемстве падчас экскурсіі.

«Як гэта зразумець? Усе былі на экскурсіі, адна я была на пікеце?.. Калі гэта было парушэньне, то куды ж вы глядзелі цягам дзьвюх гадзін? Чаму вы не зрабілі заўвагі? Чаму не запыталіся, што яны значаць, а працягвалі ўдзельнічаць у маім „пікеце“?» — задае рытарычнае пытаньне міліцыянтам Баброўская.

Раней Баброўская адседзела 5 дзён за тое, што стаяла з плякатам супраць гвалту ў Дзень маці. У суд над ёй тады нікога не пусьцілі праз эпідэмію каранавірусу. Пасьля вызваленьня яе вывезьлі з РАУС, пад сьценамі якога чакалі сваякі, і высадзілі за мястэчкам.

Сям’я Баброўскіх займаецца праектам па ўшанаваньні 10 наваградзкіх семʼяў, якія ў апошнюю вайну хавалі ў сябе габрэяў. Гэты праект пачалі абмяркоўваць, калі яшчэ быў жывы бізнэсовец і мэцэнат Сяргей Коваль, стваральнік сядзібы ў Літоўцы.

Гэтая публікацыя падрыхтаваная з выкарыстаньнем інфармацыі БелаПАН.