Валер Астрынскі — інвэстар, сузаснавальнік аб’яднаньня Angels BAND, уваходзіць у топ-200 пасьпяховых і ўплывовых бізнэсоўцаў Беларусі па вэрсіі выданьня «Ежедневник». Напярэдадні яго затрымалі за бел-чырвона-белы сьцяг, які ён вывесіў у сябе на хутары. Пра гэта ў фэйсбуку напісала ягоная жонка Тацяна Бакланава.
Зь вечара 16 студзеня ён у Івейскім РАУС. На холад ня скардзіцца. Жонка сказала, што Валера «здаў» нехта з жыхароў навакольля.
«Зь лета на калодзежы нашай хаткі на хутары вісеў сьцяг з „Пагоняй“. Нікому не замінаў, бо хутар, лес навокал, вёска ўбаку. У пятніцу ўвечары прыехалі з малымі на хутар на выходныя. У суботу а 8-й раніцы прыехала міліцыя. Паступіла скарга ад мясцовага жыхара (пару бабак-дзядкоў, фэрма). Склалі пратакол».
Міліцыянты паведамілі сям’і, што калі б вісела проста «Пагоня», тады было б добра, але бел-чырвона-белы фон «ніяк нельга». Назвалі гэта адзіночным несанкцыянаваным пікетам і сказалі чакаць званка з запрашэньнем у Івейскі суд.
У суботу ў 21:30 муж і жонка глядзелі з малымі дзецьмі фільм, пабачылі фары на вуліцы, што для хутара рэдкасьць. Пачуўся стук у дзьверы. Тыя ж міліцыянты сказалі, што «пляны памяняліся, начальства дало загад затрымаць».
Суд, па словах жонкі, адбудзецца ў Іўі ў панядзелак прыкладна а 10-й гадзіне.
ГЛЯДЗІЦЕ ТАКСАМА: Каля Курапатаў затрыманы Зьміцер Дашкевіч ГЛЯДЗІЦЕ ТАКСАМА: Менчукам разьбілі вокны зь бел-чырвона-белымі сьняжынкамі. Міліцыя: «Гэта выказваньне меркаваньня»