Аляксандар Дзядок 30 гадоў працаваў у судовай сыстэме, быў сьледчым, пракурорам і судзьдзёй. Звольніўся ў 2009-м. Праз год яго сына Мікалая затрымалі па справе аб «нападзе на амбасаду Расейскай Фэдэрацыі» і асудзілі на 4,5 года пазбаўленьня волі.
Стаўшы блогерам, актывіст анархісцкага руху Мікалай Дзядок шмат выказваўся пра падзеі ў Беларусі. 11 лістапада 2020 году супрацоўнікі ГУБАЗіК і МУС затрымалі яго, моцна зьбіўшы. Пазьней на тэлебачаньні паказалі пакаяльны ролік з удзелам Міколы.
Цяпер Аляксандар Дзядок зноў змагаецца за вызваленьне сына і заклікае ўсіх сваякоў палітычных зьняволеных публічна казаць пра тое, што адбываецца зь іх роднымі.
У інтэрвію Свабодзе ён расказаў пра адукацыю і працу сына, пра катаваньні і побыт у турме, а таксама выказаў думку, як зьвязаны ягоны ўласны сыход з судовай сыстэмы Беларусі з крымінальным перасьледам сына.