Людміла — дачка вядомага жывапісца, народнага мастака Беларусі Леаніда Шчамялёва. Працуе ў стылі «арт-наіў». Яе творы — гэта міні-гісторыі штодзённага побыту звычайных людзей, яны шчодра аздобленыя гумарам і іроніяй.
ГЛЯДЗІЦЕ ТАКСАМА: Сумныя карціны на «дзень дурня»: як менская мастачка малюе каранавірус і самаізаляцыюАле 2020-ы ўнёс свае карэктывы. У першай палове году многія яе працы былі прысьвечаныя наступствам «каранавіруснага псыхозу», падчас якога ўлады фактычна кінулі людзей на самавыжываньне ва ўмовах пандэміі. Усьмешкі зьмяніліся роздумам.
А вось другая частка атрымала выразна палітычную афарбоўку — гэта час грамадзянскага абуджэньня беларусаў, змаганьня за сваю будучыню.
Людміла Шчамялёва з мужам-мастаком Ігарам Рымашэўскім на адкрыцьці выставы
Сама мастачка ў размове са Свабодай кажа, што чакала «прарэджваньня» экспазыцыі цэнзарамі. Нават дзівіцца, што некаторыя ідэалягічна «крамольныя» працы ўсё ж засталіся на месцы. Напрыклад, як гэтая, што на фота ніжэй.
Галіна Іванаўна, 93-гадовая мама Людмілы Шчамялёвай
«Пры першым позірку многія думаюць, што гэта партрэт Ніны Багінскай, — расказвае Людміла Шчамялёва пра жанчыну зь бел-чырвона-белым сьцяжком на камізэльцы. — Насамрэч гэтая мая мама Галіна Іванаўна. Ёй 93 гады, яна пасьля інфаркту і, натуральна, далучыцца да шэсьцяў ня ў стане фізычна. Але свае кілямэтры пратэсту выхадзіла яшчэ ў 1990-х ды нулявых. Цяпер зь беларусамі ў думках. Так і сказала: «Пакуль не пераможам — не памру».
Тут жа зборны вобраз сёлетняга жаночага супраціву. Прататыпам стала вядомая ўсім экстравагантнай шлюбнай сукенкай «бел-чырвона-белая нявеста» Іна Зайцава, якая праз рэпрэсіі і перасьлед вымушаная была зьехаць зь Беларусі.
«Чырвоныя губы»: колеры сёлетняй Беларусі
Жаночы ўнёсак увасоблены і ў іншых творах — як, напрыклад, «Чырвоныя губы». Гэтая праца вынесена на афішу да пэрсанальнай выставы. Дарэчы, дзьверы імпрэзы адчыненыя да 15 студзеня.
У «патрыятычнай» стылістыцы апошнім часам працуе і муж Людмілы Шчамялёвай, папулярны мастак Ігар Рымашэўскі. Так, ягоная «Беларуская марсэльеза» зьявілася адразу пасьля драматычных падзеяў жніўня.
«Беларуская марсэльеза» Ігара Рымашэўскага
Апрача палотнаў, мастак экспэрымэнтуе з каменем. Адна з працаў так і называецца — «Камень рэвалюцыі», пра супрацьстаяньне сілавікоў з уласным народам. Або — каменны жывапіс пад назвай «Свабода», з байкерамі пад нацыянальнай сымболікай.
«Камень рэвалюцыі», аўтар Ігар Рымашэўскі
Ігар Рымашэўскі нарадзіўся 25 лістапада 1959 году, ягоная жонка Людміла Шчамялёва зьявілася на сьвет на паўгода пазьней, яна дачка славутага мастака Леаніда Шчамялёва. Разам вучыліся ў Менскай мастацкай вучэльні.
Пасьля заканчэньня ўстановы Людміла занялася самастойнай творчасьцю, Ігар працягнуў адукацыю ў Беларускім тэатральна-мастацкім інстытуце. Ад пачатку 1980-х іх творы пачалі экспанавацца на рэспубліканскіх і міжнародных выставах. Працы мастакоў знаходзяцца ў зборах музэяў, галерэяў і ў прыватных калекцыях на ўсіх кантынэнтах.
Выстава твораў Людмілы Шчамялёвай будзе працаваць да 15 студзеня па адрасе праспэкт Незалежнасьці, 12.
ГЛЯДЗІЦЕ ТАКСАМА: «Глядзець на лукашэнкаўскую Беларусь невыносна цяжка». Сілавікі і пратэстоўцы ў жывапісных гісторыях Ігара Рымашэўскага