Ад ускладненьняў, выкліканых COVID-19, у 94 гады памёр былы прэзыдэнт Францыі Валеры Жыскар дʼЭстэн.
Ён быў кіраўніком дзяржавы з 1974 да 1981 году.
У Эўропе ён усталяваў цесныя стасункі з тагачасным канцлерам Нямеччыны Гельмутам Шмітам, і разам яны заклалі асновы адзінай валюты эўра, усталяваўшы Эўрапейскую валютную сыстэму.
Валеры Жыскар дʼЭстэн і Гельмут Шміт, 1974 год
У Францыі Валеры Жыскар дʼЭстэн праводзіў лібэральную палітыку, сярод іншага легалізаваў аборты і развод паводле ўзаемнай згоды.
Яму таксама прыпісваюць запуск вялікіх інфраструктурных праектаў: сеткі высакахуткасных цягнікоў TGV і далучэньня Францыі да ядзернай энэргетыкі.
Пасьля паразы на прэзыдэнцкіх выбарах у 1981 годзе Валеры Жыскар дʼЭстэн заставаўся актыўным палітыкам, быў дэпутатам і кіраўніком рэгіянальнай рады.
З 1989 да 1993 ён быў сябрам Эўрапейскага парлямэнту.
Завяршыў сваю палітычную карʼеру Валеры Жыскар дʼЭстэн у 2004 годзе.
ГЛЯДЗІЦЕ ТАКСАМА: Былы нямецкі канцлер Гельмут Шмідт памёр у адзін дзень з Брэжневым