Улады забаранілі жыхарам Туркмэністану, старэйшым за 45 гадоў, езьдзіць па краіне

Улады Туркмэністану забаранілі жыхарам краіны, старэйшым за 45 гадоў, езьдзіць паміж рэгіёнамі.

Пра гэта паведамляе туркмэнская служба Радыё Свабода са спасылкай на свайго карэспандэнта. Выданьне «Медия-Туркмен» сьцьвярджае, што забарону ўвялі для асобаў, старэйшых за 50 гадоў — ім забаронена выяжджаць з роднага гораду.

Паводле карэспандэнта Радыё Свабода, у Лепабскім вілаяце на ўсходзе краіны ўстановы аховы здароўя, паліцыя і іншыя афіцыйныя органы тлумачаць прычыны новых абмежаваньняў тым, што ў асобаў, старэйшых за 45 гадоў, слабы імунітэт і яны схільныя да інфэкцыйных захворваньняў. Верагодна, што забарону ўвялі з прычыны пандэміі каранавірусу, хоць улады Туркмэністану сьцьвярджаюць, што ў краіне няма ніводнага інфікаванага.

На пачатку лістапада ў Туркмэністане забаранілі перамяшчацца паміж рэгіёнамі без паважнай прычыны, забарона дзейнічае да 2021 году. У сакавіку ў краіне быў спынены чыгуначны і аўтобусны транспарт, перакрылі шматлікія аўтадарогі паміж буйнымі гарадамі. У жніўні ўвялі абавязковае нашэньне масак — паводле афіцыйнай вэрсіі, праз павышаную канцэнтрацыю пылу ў паветры.