Польскае камэрцыйнае Radio Wnet, якое трансьлюецца ў найбуйнейшых гарадах Польшчы ў FM-дыяпазоне і ў Інтэрнэце, стварыла два адмысловыя беларускамоўныя блёкі — раніцай «Сьвітанак Свабоды» і ўвечары «Жыве Беларусь уначы».
У стварэньні праграм удзельнічае некалькі камандаў — у Варшаве і Кіеве, дзе менавіта пад беларускі кантэнт стварылі радыёстудыю.
Павал Бабаловіч
Пра першыя крокі і пляны беларускага радыё Wnet Свабодзе расказаў адзін з ініцыятараў праекту Павал Бабаловіч — ён доўгі час працуе ў Кіеве ўласным карэспандэнтам Radio Wnet.
«Наш праект найперш адрасаваны тым беларусам, якія вымушаныя былі зьехаць зь Беларусі праз апошнія палітычныя падзеі. З аднаго боку, мы хочам перадаваць інфармацыю, зьвязаную з новымі мігрантамі, калі іх так можна назваць, а з другога боку, таксама для тых, хто застаўся па той бок, у Беларусі.
На жаль, мы можам даваць час для эфіру толькі раніцай і ўначы, калі няма польскага вяшчаньня. Але кантэнт даступны онлайн і ў інтэрнэце ў выглядзе падкастаў, якія можна слухаць у любы момант. У камандзе працуюць журналісты і актывісты зь Беларусі, а таксама і палякі, а ў кіеўскай камандзе — і ўкраінцы. Пакуль што наш праект разьлічаны на некалькі месяцаў. Магчыма, ён будзе падоўжаны. Мы спадзяёмся, што ён будзе цікавы, а мара такая, каб у будучыні на аснове гэтай каманды, калі прыйдзе час, у Беларусі зьявіўся яшчэ адзін свабодны СМІ.
Беларускае Radio Wnet пакуль не самастойная ініцыятыва, гэта частка польскага Radio Wnet. Цяпер у нас выходзяць у эфір дзьве праграмы — «Сьвітанак Свабоды» і «Жыве Беларусь уначы». Мы плянуем стварыць яшчэ адну праграму «Ноч Свабоды», якая будзе выходзіць у эфір у ноч у нядзелю. Мы хочам, каб гэтая праграма была інтэрактыўная, каб мы маглі размаўляць з нашымі слухачамі. І зараз мы працуем над гэтым і з карэспандэнтамі, і з экспэртамі і ва Ўкраіне, і ў Польшчы, і ў Беларусі. Кожны дзень у нас ёсьць уключэньні зь Менску, Горадні, зь іншых беларускіх гарадоў, а таксама залучаем тых актывістаў, якія нядаўна прыехалі ў Кіеў.
Мы разьлічваем на актыўную частку грамадзтва — людзей ад 20 да 50 гадоў, якія карыстаюцца інтэрнэтам і сацыяльнымі сеткамі. Гэта якраз тая катэгорыя, якая актыўна ўдзельнічае ў цяперашніх падзеях у Беларусі. Якая аўдыторыя цяпер — цяжка сказаць, бо мы працуем толькі тыдзень.
Беларускі кантэнт трансьлюецца і на тэрыторыі Польшчы, раніцай і ўначы. Мы хочам таксама, каб вячэрні кантэнт меў больш культурную ды музычную накіраванасьць, а ранішні — публіцыстычна-інфармацыйную. Гэты праект — некамэрцыйны, рэалізуецца яшчэ і ў партнэрстве зь літоўскім Radio Znad Wilii. Фінансуецца ён за кошт польскай кампаніі і часткова грантаў польскага Фонду міжнароднай салідарнасьці.
У нашай камандзе, у Варшаве і Кіеве, працуе некалькі дзясяткаў чалавек. Хочам яшчэ стварыць каманду ў Вільні. А сама ідэя рэалізацыі праекту ўзьнікла ў часе сустрэчаў зь беларусамі ва Ўкраіне і ў Польшчы, пасьля таго як яны пачалі зьяжджаць у гэтыя краіны ад крымінальнага перасьледу ў Беларусі».