Чаму супраць нядзельнага маршу ўлады кінулі такія вялікія сілы? Якія тэндэнцыі пратэсту? Ці назіраецца яго радыкалізацыя?
Над гэтымі тэмамі ў «Праскім акцэнце» разважаюць заснавальнік і ўласьнік рэсурсу «Сильные новости» Пётар Кузьняцоў і палітычныя аглядальнікі Валер Карбалевіч і Віталь Цыганкоў.
Карбалевіч
- Лукашэнка прызнаў, што ён дае загад сілавікам, як дзейнічаць падчас акцыяў пратэсту.
- Уладзе невыносна глядзець, як кожную нядзелю сталіца ператвараецца ў сьвята непадпарадкаваньня.
- Улада адчула стому і пратэстоўцаў, і сілавікоў. Ёсьць спакуса адным ударам скончыць пратэст.
- Пратэст у рэгіёнах амаль сьціх, і таму мясцовую міліцыю можна перакінуць у Менск.
- Магчыма, Пуцін даў Лукашэнку тэрмін, каб скончыць з пратэстам, і Лукашэнка ў тэрмін не ўкладаецца.
- Радыкалізацыя назіраецца ў тэлеграм-каналах, але не на вуліцы.
- Гэта дзяржаўныя тэлеканалы кажуць, што няма ніякага мірнага пратэсту, а ёсьць баевікі, якія б’юцца зь міліцыяй.
- Улады зацікаўленыя ў сілавым супрацьстаяньні, яны разумеюць, што пры сілавым сутыкненьні перавага будзе на іх баку.
- Спроба перавесьці пратэст у сілавое рэчышча — не на карысьць пратэстоўцаў.
- Цяпер прыцягваюць да адказнасьці людзей за іх дзеяньні ў жніўні.
- Лукашэнка хоча адпомсьціць усім. Ён атрымаў цяжкую псыхалягічную траўму, і за яе беларусы, на яго думку, павінны заплаціць.
Кузьняцоў
- Пратэставыя настроі нікуды не падзеліся і ўжо не падзенуцца і ў Менску, і ў рэгіёнах.
- Цяжка чакаць ад людзей, што яны доўга будуць хадзіць на пратэсты, як на працу.
- Пратэставы рух складаецца не з салдатаў, людзі ня ходзяць на пратэст на загад.
- Новыя падзеі могуць надаць новы імпульс пратэстам.
- Я не лічу радыкальнымі дзеяньнямі, калі пратэстоўцы спрабуюць адбіць сваіх таварышаў.
- Сапраўдная радыкалізацыя немагчымая ў цяперашніх беларускіх умовах. Няма людзей, няма структураў, якія маглі б сплянаваць і ажыцьцявіць сілавы пратэст.
- Манаполія на гвалт у нас — у дзяржавы.
- Дваровыя чаты і самаарганізацыя адыграюць сваю ролю падчас выбараў у мясцовыя саветы ў 2021 годзе.
- Настрой людзей паўплывае на эканамічнае становішча, народ не давярае ўладзе, людзі ня будуць інвэставаць пры гэтай уладзе.
Цыганкоў
- На кожнага з тых 100–200 тысячаў, якія выходзілі на пратэсты, ёсьць чалавек па 10, якія хацелі б выйсьці, якія таксама не прымаюць гэтую ўладу.
- Пратэставы рух не абмяжоўваецца тымі, хто практычна выходзіць на пратэсты.
- Мне здаецца, што нельга сыходзіць з вуліц. Калі б нехта прапанаваў, што трэба на пэўны час спыніць вулічныя акцыі, то я быў бы супраць.
- Такое ўражаньне, што «людзям у чорным» падабаецца тое, што яны робяць, і яны будуць гэта рабіць, пакуль пратэст будзе заставацца мірным.
- Ва Ўкраіне на Майдане пачалі страляць невядомыя асобы. Калі там пачалася страляніна — «Беркут» уцёк.