Праўладны нядзельны мітынг, на які ў Менск мелі намер звозіць цягнікамі і аўтобусамі людзей з усёй краіны, можа не адбыцца.
Бюджэтнікі і працаўнікі прадпрыемстваў паведамляюць, што ім кажуць, што акцыі на гэтыя выходныя ў сталіцы Беларусі скасоўваюцца, паведамляе Tut.by.
Рэдакцыя парталу атрымала дзясяткі паведамленьняў пра адмену мітынгаў — як у нядзелю, так і ў суботу. Сярод прычын — масавая адмова людзей ад падобных паездак і распаўсюд каранавірусу.
Арганізацыям гандлю таксама далі «адбой» і паведамілі, што ня трэба ставіць намёты каля стэлы і Палацу спорту ў гэтыя выходныя.
У Фэдэрацыі прафсаюзаў, якая разам зь іншымі арганізацыямі выступала заяўнікам на праўладныя мітынгі, пакуль не камэнтуюць сытуацыю.