Якія вынікі «круглага стала ў СІЗА»? Ці пагадзіўся Бабарыка на прапановы Лукашэнкі? На якую Канстытуцыю гатовы Лукашэнка? Якія шляхі вырашэньня беларускага крызісу?
Гэтыя пытаньні абмяркоўваюць у Праскім акцэнце блогер Сяргей Лаўрыненка і палітолягі: кіраўнік беларускага Цэнтру стратэгічных і замежнапалітычных дасьледаваньняў Арсені Сівіцкі і навуковы супрацоўнік дасьледчага цэнтру Барыса Нямцова ў Празе, экспэрт міжнароднай ініцыятывы iSANS (The International Strategic Action Network for Security) Аляксандар Марозаў.
Лаўрыненка:
- Магчыма, мы на гэтым тыдні ўбачым вызваленьне Бабарыкі.
- Калі ўмова вызваленьня — гэта заклік да спыненьня пратэстаў і ўдзел у канстытуцыйным працэсе, то згода на гэта — гэта палітычная сьмерць у цяперашніх умовах. Людзі, якія выходзяць на вуліцу, гэтага ня прымуць.
- Формула канстытуцыйнай рэформы Лукашэнкі — чым менш зьмястоўных зьменаў, тым лепш.
- У грамадзтва ёсьць канкрэтнае патрабаваньне — гэта сыход Лукашэнкі ад улады. Але яно ў цэлым не гатовае на радыкальныя крокі, на штурм прэзыдэнцкай рэзыдэнцыі.
- Гэтае становішча стварае нестабільнасьць. І ня толькі ў сэнсе пратэстаў. Але гэта спараджае недавер замежных інвэстараў, недавер Масквы. Масква не гатовая даваць грошы, бо ня ведае, як будзе разьвівацца сытуацыя.
- Размова Масквы пра Канстытуцыю — гэта размова пра сыход Лукашэнкі.
Марозаў:
- Я б хацеў, каб Бабарыка выйшаў на волю. Лепш так, чым сядзець яшчэ некалькі гадоў, як гэта было пасьля 2010 году.
- Канстытуцыйная рэформа і рэфэрэндум па ёй, хутчэй за ўсё, адбудуцца — у адрозьненьне ад датэрміновых прэзыдэнцкіх выбараў. Лукашэнка будзе пазьбягаць гэтага.
- Бабарыка казаў пра стварэньне партыі, Знак пра гэта казаў. Калі б яны змаглі яе стварыць і ўдзельнічаць у парлямэнцкіх выбарах, гэта быў бы не найгоршы варыянт.
- Адносна людзей на вуліцы Лукашэнка не зьбіраецца мяняць сваю палітыку. Калі ён прапануе зьдзелку палітвязьням, гэта ня значыць, што ён будзе дзейнічаць інакш адносна пратэсту.
Сівіцкі:
- І ўнутры краіны, і на міжнароднай арэне складаюцца ўмовы, якія Аляксандар Лукашэнка ня можа ігнараваць.
- Лукашэнка зараз паспрабуе абмяняць канстытуцыйную рэформу на фінансавую падтрымку заходніх краінаў.
- Ён зараз вызваліць амаль усіх палітвязьняў, у тым ліку і Бабарыку, і Ціханоўскага, прычым незалежна ад таго, ці пагадзіліся яны ўдзельнічаць у ягонай канстытуцыйнай рэформе.
- Рэформа паводле Лукашэнкі павінна прывесьці да такога транзыту ўлады, пры якім ён захавае свой статус у беларускім палітычным ляндшафце.
- Зараз казахстанскі варыянт падаецца яму даволі пэрспэктыўным.