Толькі што адбылася тэлефонная размова Сьвятланы і Сяргея Ціханоўскіх, паведаміў афіцыйны тэлеграм-канал экс-кандыдаткі ў прэзыдэнты Беларусі.
Гэта першая размова за 4 месяцы, дакладней — за 134 дні.
Як сказаў Свабодзе дарадца Сьвятланы Ціханоўскай у міжнародных справах Франак Вячорка, Сьвятлана і Сяргей размаўлялі 12,5 хвіліны.
Паводле Вячоркі, Сяргей Ціханоўскі сказаў Сьвятлане «быць больш жорсткімі», працягваць сустракацца з сусьветнымі лідэрамі і працягваць змагацца. У цэлым мэсыдж быў такі, што «нельга здавацца, трэба ісьці на большае». Ён сказаў Сьвятлане, што сочыць за ўсімі навінамі.
Таксама Ціханоўскія размаўлялі пра дзяцей, пра сям’ю, ці ўсе цяпер у бясьпецы. Сяргей расказаў пра ўмовы ўтрыманьня і назваў, што яму трэба перадаць у турму, сказаў, што трошкі паправіўся ў турме.
Франак Вячорка сказаў са слоў Сьвятланы Ціханоўскай, што да гэтай размовы ёй напісала сястра і сказала, што Сяргей шукаў яе нумар, а потым набраў яе сам са схаванага нумару.
Пазьней у Тэлеграм-канале Сьвятланы Ціханоўскай былі апублікаваная стэнаграма і відэафрагмэнт размовы. Сяргей Ціханоўскі, сярод іншага, сказаў, што бачыць жонку ў тэлевізары штодня. На пажаданьне Сяргея быць больш жорсткай Сьвятлана сказала, што баіцца, каб гэта не адбілася на палітвязьнях, але ўрэшце пагадзілася з мужам.
Таксама Сьвятлана Ціханоўская пракамэнтавала сустрэчу ў СІЗА КДБ і размову з мужам:
«Сёньняшнія падзеі — гэта вынік нашага з вамі ціску. Гэтай сустрэчай Лукашэнка прызнаў існаваньне палітвязьняў, якіх раней называў крымінальнікамі. І калі ён хацеў паказаць гатоўнасьць да дыялёгу, то павінен вызваліць палітвязьняў неадкладна. Дыялёг у турэмнай камэры не вядзецца. Ён кажа пра Канстытуцыйную рэформу, але робіць гэта, толькі каб аслабіць наш пратэст. Мы працягнем жорстка стаяць на сваім і мірна дамагацца новых выбараў».
ГЛЯДЗІЦЕ ТАКСАМА: Лукашэнка сустрэўся з Бабарыкам і іншымі палітвязьнямі ў СІЗА КДБМуж Сьвятланы Ціханоўскай — відэаблогер, аўтар youtube-каналу «Страна для жизни» Сяргей Ціханоўскі — з 29 траўня ў зьняволеньні. Яго затрымалі ў Горадні падчас пікету па зборы подпісаў за вылучэньне кандыдатам у прэзыдэнты ягонай жонкі Сьвятланы Ціханоўскай.
8 чэрвеня Сяргею Ціханоўскаму, як і яшчэ шасьці затрыманым, прад'явілі абвінавачаньне паводле ч. 1 арт. 342 Крымінальнага кодэксу Беларусі. Пазьней Ціханоўскаму прадʼявілі абвінавачаньне яшчэ па артыкуле 191 КК РБ. Цяпер ён у сьледчым ізалятары ў Жодзіне.
Праваабаронцы прызналі Сяргея Ціханоўскага палітвязьнем.
Затрыманьні Ціханоўскага і яго прыхільнікаў. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- 14 сьнежня 2021 году Сяргея Ціханоўскага асудзілі на 18 гадоў зьняволеньня, прызнаўшы вінаватым паводле чатырох артыкулаў Крымінальнага кодэксу: ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варожасьці); ч. 2 арт. 191 (перашкода працы ЦВК, заяву на яго падала старшыня ЦВК Лідзія Ярмошына), ч. 1 арт. 342 (арганізацыя дзеяньняў, што груба парушаюць грамадзкі парадак).
- Пасьля прысуду Ціханоўскі спачатку трапіў у папраўчую калёнію № 15 Магілёва. Але ў жніўні 2022-га яму ўзмацнілі рэжым і перавялі на 3 гады ў турму № 8 у Жодзіне, дзе зноў судзілі і дадалі яшчэ 1,5 года зьняволеньня за «непадпарадкаваньне патрабаваньням адміністрацыі». Агулам тэрмін зьняволеньня Сяргея Ціханоўскага цяпер складае 19,5 года.
- З сакавіка 2023 году сваякі Сяргея Ціханоўскага не атрымліваюць аніякай інфармацыі ад яго.
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.