Міністар замежных спраў Украіны Дзьмітры Кулеба заявіў, што Ўкраіна далучыцца да эўрапейскіх санкцый супраць Беларусі.
«Мы настроеныя далучыцца да гэтых санкцый, бо тут ужо гаворка пра пасьлядоўнасьць палітыкі», — сказаў Дзьмітры Кулеба ў інтэрвію «BBC News Україна».
Міністар патлумачыў, што паколькі Ўкраіна падтрымлівае Эўрапейскі Зьвяз, то мусіць быць салідарнай і пазыцыя наконт Беларусі:
«Тут вельмі важнае пытаньне салідарнасьці. Заўважу, што для нас цана такой палітыкі салідарнасьці нашмат вышэйшая — мы не сябры Эўразьвязу, не сябры NATO і не знаходзімся пад парасонам „абароны“ гэтых інстытутаў і рэсурсаў, якія яны надаюць гэтым краінам. Але, тым ня менш, нават у такіх складаных умовах мы робім усё, што ў нашых сілах, каб дапамагчы народу Беларусі ў гэтай складанай сітуацыі».
ГЛЯДЗІЦЕ ТАКСАМА: Ціханоўская выступіла за пашырэньне санкцыйнага сьпісуМіністар замежных спраў Украіны адзначыў, што ўкраінскія ўлады не плянуюць скарачаць эканамічную супрацу, каб не зрабіць Беларусі яшчэ горш.
«Тут пытаньне ў іншым — трэба паглядзець, што будзе зь беларускай эканомікай у найбліжэйшыя месяцы з пункту гледжаньня расейскіх грошай і расейскага кантролю. Вось тады давядзецца сядаць і аналізаваць кожны вялікі кантракт і глядзець, ці не зьявіліся дадатковыя рызыкі, бо ў нас высокае ўзаемадзеяньне і ў вайскова-гандлёвым сэктары. Але я не лічу, што ўвядзеньне гандлёвага эмбарга з боку Беларусі ці з боку Ўкраіны было б мудрым крокам».
«Трэба будзе глядзець канкрэтныя выпадкі — ёсьць вялікія гіганты, ёсьць канкрэтныя кантракты. Калі гэта пераходзіць пад кантроль расейцаў — а мы ведаем, што там, дзе расейскі бізнэс, там і расейская ФСБ, — трэба будзе садзіцца і вылічваць рызыкі».
Адначасова Дзьмітры Кулеба падкрэсьліў, што падстаў для разрыву дыпляматычных дачыненьняў зь Беларусьсю або для скарачэньня колькасьці дыпляматаў няма. «Але я бачу падставы згарнуць афіцыйныя кантакты, пакінуўшы вакно камунікацыі ў МЗС», — дадаў ён.
ГЛЯДЗІЦЕ ТАКСАМА: Эўразьвяз увёў у дзеяньне санкцыі супраць Беларусі