Максім Знак шырока вядомы як сябра прэзыдыюму Каардынацыйнай рады і адвакат Віктара Бабарыкі. Але ён таксама спартовец-трыятляніст.
Відэазварот запісалі ўдзельнікі трыятлёну «Ironman» — спаборніцтва на звышдоўгую дыстанцыю з заплывам на 3,86 км, роварным заездам на 180,25 км і забегам на 42,195 км. Тыя, хто ўдзельнічае ў такім спаборніцтве, кажуць, што гэта Знак — «жалезны чалавек».
Максіма Знака затрымалі 9 верасьня і пасадзілі ў СІЗА № 1 Менску. 18 верасьня яму прад’явілі абвінавачаньне паводле ч. 3 арт. 361 Крымінальнага кодэксу — заклікі да дзеяньняў, накіраваных на прычыненьне шкоды нацыянальнай бясьпецы Рэспублікі Беларусь. Дэманструючы нязгоду, ён абвясьціў галадоўку і трымаў яе да 28 верасьня.
Паволе абаронцаў, Максім Знак адчуў вялізную падтрымку: пачынаючы ад салідарнасьці калег-адвакатаў, якія падалі дзясяткі хадайніцтваў аб асабістым паручальніцтве, і заканчваючы лістамі незнаёмых людзей.