Міністар замежных справаў Украіны Дзьмітро Кулеба заяўляе, што выбар Аляксандра Лукашэнкам падтрымкі Расеі стварае для Ўкраіны рызыку, якая «зашкальвае», паведамляе УНІАН.
Пра гэта Кулеба заявіў у праграме «Свабода слова» Савіка Шустэра на тэлеканале «Ўкраіна».
«Зараз найбольшы недахоп — гэта недахоп канкрэтных крокаў. Таму Беларусь у сутнасьці закрылася. На сёньняшні дзень яна адхіліла прапановы пасярэдніцтва», — сказаў Кулеба.
Кіраўнік замежнапалітычнага ведамства падкрэсьліў, што зараз асноўная задача — наладжаньне ў Беларусі пасярэдніцтва паміж уладай і апазыцыяй.
«Але Беларусь адмовілася. Украіна прапанавала пасярэдніцтва разам зь дзяржавамі Люблінскага трыкутніка — з Польшчай і Літвой. Суседзі, найбліжэйшыя, — дзьве дзяржавы ЭЗ і адна не ЭЗ. Маўчаньне», — сказаў Кулеба.
Ён таксама сказаў, што ёсьць прапанова аб нэўтральным пасярэдніцтве ад АБСЭ, але ў адказ на сумесную прапанову Альбаніі, якая старшынюе ў АБСЭ, і Швэцыі, якая будзе старшыняваць у 2021 годзе, ўлада Беларусі таксама маўчыць.
«Аляксандар Лукашэнка зрабіў свой выбар — ён выбраў Расею, Уладзіміра Пуціна. І гэта азначае канфрантацыю, і гэта ключавая сітуацыя», — сказаў Кулеба.
Ён дадаў, што Украіна ўзважвае ўсе рызыкі для Ўкраіны з прычыны ўмацаваньня Расеі ў Беларусі.
«І мы разумеем, што калі Аляксандар Лукашэнка выбірае Расею, то рызыкі для нас пачынаюць зашкальваць, і мы адпаведна гэтаму выстройваем да яго сваё стаўленьне», — сказаў Кулеба.