Улады ЗША заклікаюць Менск неадкладна вызваліць паліттэхноляга Віталя Шклярава, затрыманага ў канцы ліпеня ў Гомлі, заявіў дарадца ў галіне нацыянальнай бясьпекі прэзыдэнта ЗША Роберт О’Браен.
«Злучаныя Штаты заклікаюць да неадкладнага вызваленьня Віталя Шклярава, амэрыканскага грамадзяніна і мужа амэрыканскага дыплямата, несправядліва затрыманага ў Беларусі амаль на два месяцы таму. Спадар Шкляраў павінен быць вернуты сваёй сям’і», — гаворыцца ў паведамленьні О’Браена, апублікаваным у твітэры.
ГЛЯДЗІЦЕ ТАКСАМА: «Прыбярыце Ціханоўскага і пастаўце любога, будзе тое самае». 15 цытатаў арыштаванага паліттэхноляга Шклярава
Шклярава затрымалі 29 ліпеня ў Гомлі. 7 жніўня яму выставілі абвінавачваньне ў арганізацыі і падрыхтоўцы дзеяньняў, што груба парушаюць грамадзкі парадак.
Санкцыі паводле гэтага артыкула прадугледжваюць да 3 гадоў пазбаўленьня волі.
Шкляраў — 44-гадовы ўраджэнец Гомля. Як ён сам сябе пазыцыянаваў — «амэрыканскі, нямецкі і расейскі палітычны кансультант, паліттэхноляг, дарадца выбарчых кампаній Барака Абамы, Бэрні Сандэрса, Ангелы Мэркель, Ксеніі Сабчак». Жонка Шклярава — грамадзянка ЗША, дыплямат, працуе ў амбасадзе ЗША ў Кіеве.
ГЛЯДЗІЦЕ ТАКСАМА: У палітвязьня Шклярава зламаны палец і высокая тэмпэратура, падазрэньне на каранавірус