Купалаўскі тэатар адмяніў паказы ўсіх спэктакляў да канца лістапада

У Нацыянальным акадэмічным тэатры імя Янкі Купалы аб’явілі прастой на тры месяцы, усе спэктаклі адмененыя да сьнежня, паведамілі БелаПАН у прэс-службе ўстановы.

Там пацьвердзілі, што працягваюць звальняцца супрацоўнікі. У ліку апошніх — народныя артысты Беларусі Віктар Манаеў, Аляксандар Падабед, акторы Яўгенія Адаменка, Марта Голубева, Дзіяна Камінская, Мікалай Кучыц.

ГЛЯДЗІЦЕ ТАКСАМА: «Спроба паставіць на калені беларускую культуру». Латушка пракамэнтаваў масавыя звальненьні з Купалаўскага тэатру

У канцы жніўня сышлі адразу 56 купалаўцаў, у тым ліку 36 актораў. Сярод іх вядучыя майстры сцэны Юлія Шпілеўская, Ігар Дзянісаў, Павал Харланчук-Южакоў, Зоя Белахвосьцік, Натальля Васільева-Качаткова, Алена Сідарава, Арнольд Памазан, Алег Гарбуз, Сьвятлана Анікей, Андрэй Кавальчук, Міхаіл Зуй, Раман Падаляка, а таксама рэжысэры, рэдактары, адміністратары, артысты аркестра, кіраўнік літаратурна-драматычнай часткі. Тэатар пакінуў і мастацкі кіраўнік Мікалай Пінігін.

Паводле прэс-службы, максымальна можна знаходзіцца на прастоі паўгода. Пасьля гэтага нічога не застанецца, як шукаць новага дырэктара, мастацкага кіраўніка і трупу.

ГЛЯДЗІЦЕ ТАКСАМА: Кіеўскі тэатар імя Франка запрасіў звольненых купалаўцаў адсьвяткаваць юбілей беларускага тэатру ва Ўкраіне

Праблемы ў калектыву пачаліся ў сярэдзіне жніўня, калі супрацоўнікі разам са сваім гендырэктарам Паўлам Латушкам публічна асудзілі фальсыфікацыі прэзыдэнцкіх выбараў і свавольства сілавікоў. 17 жніўня Латушка быў звольнены. На знак салідарнасьці падначаленыя пачалі масава падаваць заявы аб сыходзе.

18 жніўня ў Купалаўскі тэатар, які ў верасьні меўся адзначыць 100-годзьдзе, прыехаў міністар культуры Юры Бондар. Ён не пагадзіўся, што Латушку звольнілі з палітычных матываў, і выказаў занепакоенасьць, як тэатр будзе працаваць у такой атмасфэры. У адказ яму заявілі, што новага сэзону ня будзе, і параілі падаць у адстаўку.

ГЛЯДЗІЦЕ ТАКСАМА: Лукашэнка пра Купалаўскі тэатар: будзе поўная свабода і рынкавыя адносіны

У той жа дзень выканаўцам абавязкаў дырэктара быў прызначаны першы намесьнік міністра культуры Валеры Грамада. На ягонае распараджэньне ў тэатры зьявіліся супрацоўнікі дэпартамэнта аховы. Купалаўцы расцанілі гэта як «захоп тэатра».

Напярэдадні Аляксандар Лукашэнка заявіў, што Павал Латушка перайшоў «чырвоную рысу» і адкажа паводле закону. Экс-міністар культуры і дыплямат пасьля звальненьня з тэатру далучыўся да прэзыдыюму Кааардынацыйнай рады, яго ўжо выклікалі на допыт у Сьледчы камітэт.