Кірыл Галанаў і Ўладзіслаў Сакалоўскі зьехалі ў Літву, яны засьцерагаюцца рэпрэсіяў з боку беларускіх уладаў, піша Delfi.
Маладыя людзі ўжо былі пакараныя на радзіме за тое, што 6 жніўня падчас урадавага мерапрыемства ў Менску ўключылі песьню Віктара Цоя «Перемен», якая стала пратэстным гімнам кампаніі. На наступны дзень яны атрымалі па 10 сутак арышту за «хуліганства і аказаньне супраціву вартавым парадку».
ГЛЯДЗІЦЕ ТАКСАМА: «Дыджэя перамен» Улада Сакалоўскага адпусьцілі«Амбасада Літвы прапанавала нам дапамогу адразу пасьля здарэньня. Калі нас выпусьцілі, амбасада зноў з намі зьвязалася. Мы вырашылі скарыстацца прапанаванай дапамогай», — сказаў Улад Сакалоўскі. — Я хачу падзякаваць літоўскаму народу за падтрымку, асабліва тым, хто нам дапамог і прытуліў. Мы атрымалі больш дапамогі, чым спадзяваліся».
Ён распавёў, што палову тэрміну правёў у карцары, а на нарах спаў усяго дзьве ночы — тры іншыя драмаў на зэдліку. Пазьней даведаўся, што яго асабіста зьбіваў намесьнік міністра ўнутраных спраў Аляксандар Барсукоў.
ГЛЯДЗІЦЕ ТАКСАМА: «Дыджэй пераменаў» расказаў, што ў карцары яго біў намесьнік міністра Барсукоў21 жніўня Сакалоўскага запрасілі на гутарку ў МУС і запатрабавалі абвергнуць заяву, у іншым выпадку пагражалі распачаць справу аб паклёпе. Акрамя таго, цікавіліся пра 40 000 даляраў, якія былі сабраныя ім у падтрымку. Угаворвалі публічна сказаць, што яму «заплацілі».
Ён згадаў, у якіх умовах ўтрымлівалі пад арыштам у Менску іншых удзельнікаў акцый. Перад пераводам з карцара ў звычайную камэру забралі вопратку і абутак. Спачатку спрабавалі «падсяліць» у шасьцімесны «нумар», дзе ўжо было каля 40 чалавек — без адзеньня, практычна цалкам сінія ад пабояў, у гематомах і запечанай крыві. Але фізычна не было месца і перавялі туды, дзе было 30 арыштантаў.
ГЛЯДЗІЦЕ ТАКСАМА: «20-гадовую студэнтку ва ўпор расстрэльвалі гумавымі кулямі». Сям’я пра катаваньні на Акрэсьціна«У камэры антысанітарыя — ні туалетнай паперы, ні мыла. Там правёў пяць сутак. Ноч з 11 на 12 жніўня была самая страшная. Я чуў крыкі без паўзы на ўдых і глухія ўдары. У калідоры таксама стаялі людзі. Адзін з супрацоўнікаў сказаў: „Мы будзем рабіць з вас інвалідаў першай групы. Вы ніколі ня зможаце хадзіць“. У камэры былі людзі, якіх трымалі на вуліцы 6-8 гадзін „мордай у зямлю“ і ўвесь час білі», — апавёў жахі катавальні ў менскай турме на Акрэсьціна Ўлад Сакалоўскі.
За час, калі ў Беларусі пасьля прэзыдэнцкіх выбараў пачаліся рэпрэсіі супраць апанэнтаў улады, Літва прыняла з гуманітарнымі мэтамі 22 чалавекі, палова папрасілі палітычнага прытулку. Агулам дазвол прыехаць паводле асаблівых прычынаў атрымалі 36 беларусаў.