Стыхійная акцыя пратэсту 14 жніўня каля Дому ўраду ў Менску доўжылася каля чатырох гадзін, у ёй узялі ўдзел некалькі тысяч чалавек.
Да плошчы Незалежнасьці 14 жніўня калёнай прыйшлі рабочыя Менскага трактарнага заводу, якія распачалі страйк з палітычнымі патрабаваньнямі вызваліць палітвязьняў, «зьняць нелегітымнага прэзыдэнта» і прызначыць новыя выбары, а таксама спыніць гвалт. Да іх далучыліся і іншыя пратэстоўцы.
Перад Домам ураду іх сустрэў ланцуг з 30 байцоў і 2 камандзіраў у зялёнай форме, у касках і са шчытамі. Да іх падышлі дзяўчаты з кветкамі. Яны сказалі, што ня будуць біць людзей, дзяўчаты пачалі іх абдымаць.
Шэсьце рабочых МТЗ да Дому ўраду. ШМАТ ФОТА
Людзі ля Дому ўраду стаялі некалькі гадзін, крычалі «Выходзь», «Размаўляй!», «Лічы галасы!», «Мы за мір!» «Жыве Беларусь» і патрабавалі размовы з прадстаўнікамі ўлады, але ніхто да іх так і ня выйшаў.
Людзі стаялі, некаторыя сядзелі перад помнікам Леніну, час ад часу аплядавалі і выгуквалі: «Верым, можам, пераможам!», «Сыходзь!», «Трыбунал!».
Прыкладна ў 21.00, калі пачало цямнець, людзі запалілі ліхтарыкі на тэлефонах. Неўзабаве пасьля гэтага ўдзельнікі акцыі пачалі скандаваць «Да заўтра!» і паступова разыходзіцца. У 21.15 каля Дому ўраду заставаліся лічаныя дзясяткі грамадзян. Праваахоўнікі нікога не затрымлівалі, толькі назіралі.