Затрыманых ў Смалявічах супрацоўнікаў тэлеканалу «Белсат» карэспандэнтку Алену Шчарбінскую і апэратара Віталя Дубіка вызвалілі.
Іх аўтамабіль спынілі нібыта на падставе таго, што ён падобны на машыну, якая ўчыніла ДТЗ. Журналісты накіроўваліся ў Барысаў на пікет кандыдаткі на прэзыдэнтку Святланы Ціханоўскай.
У Менску падчас запісу камэнтару затрымалі карэспандэнта «Белсату» Арцёма Ляву і эканаміста Сяргея Чалага. Паводле інфармацыі праваабаронцаў, іх даставілі ва УУС Маскоўскага раёну. Чалага затым адпусьцілі, Ляву — праз некаторы час пасьля гэтага.
ГЛЯДЗІЦЕ ТАКСАМА: У Барысаве і Менску затрымалі журналістаў «Белсату»Пакуль няма інфармацыі пра лёс затрыманых актывістаў незарэгістраванай Беларускай сацыял-дэмакратычнай партыі (Народная Грамада) і ініцыятывы «Эўрапейская Беларусь» Вольгі Мікалайчык, Алены Філатавай, Андрэя Кірэева і Андрэя Войніча. Праваабаронцы не выключаюць, што затрыманых больш, зараз гэтая інфармацыя высьвятляецца.
Па дарозе ў Барысаў супрацоўнікі ДАІ спынялі тры машыны, на якіх ехалі Святлана Ціханоўская, а таксама прадстаўніцы штабоў Віктара Бабарыкі і Валерыя Цапкалы Марыя Калесьнікава і Вераніка Цапкала. Пасьля праверкі дакумэнтаў машынам дазволілі ехаць далей.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.