Юры Ўласаў, давераная асоба кандыдаткі ў прэзыдэнты Святланы Ціханоўскай, атрымаў адказ ад выканкамаў, што агітаваць на пікетах у Гомельскай вобласьці можна толькі ці раніцай (з 8 да 12) ці пад ноч (з 21 да 22).
Паводле Ўласава, вусна яму патлумачылі, што астатні час заняты даверанай асобай Аляксандра Лукашэнкі.
ГЛЯДЗІЦЕ ТАКСАМА: Агітаваць за Ціханоўскую ў Гомельскай вобласьці дазволілі толькі раніцай ці пад ноч. Праваабаронца: гэта свавольстваДавераная асоба прэзыдэнта ў Гомлі — гэта генэральны дырэктар ААТ «Спартак» Алег Жыдкоў. Выбарчае заканадаўства дазваляе, каб на адной пляцоўцы агітавалі і два, і тры кандыдаты — пры ўмове, што яны дамовяцца паміж сабой. Але давераныя асобы Ціханоўскай так і не знайшлі Алега Жыдкова.
«На „Спартаку“ сказалі, што ён у адпачынку, і не далі ягоны тэлефон. У гарвыканкаме сказалі, што самі яны ня здолелі пакуль зьвязацца зь ім», — кажа Свабодзе давераная асоба Ціханоўскай Юры Ўласаў.
У сераду на дзьвюх з трох дазволеных у Гомлі пляцовак для агітацыі па стане на 16.30–17.00 пікетаў не было. Супрацоўнікі стадыёну «Лякаматыў» ня чулі пра пікеты, як і работнікі Цэнтру інклюзіўнай культуры.
Пляцоўка для агітацыі ля Цэнтру інклюзіўнай культуры ў Гомлі
Пляцоўка для агітацыі ля стадыёну «Лякаматыў»
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.