Кандыдат ад Дэмакратычнай партыі на выбарах прэзыдэнта ЗША Джо Байдэн заявіў пра спробы ўмяшаньня Расеі ў лістападаўскія прэзыдэнцкія выбары ў ЗША і спаслаўся на дадзеныя выведкі ЗША, паведамляе «Голас Амэрыкі».
Як удзельнік цяперашняй фазы барацьбы за прэзыдэнцкую пасаду Джо Байдэн атрымаў доступ да зьвестак, якія прадстаўляюцца на брыфінгах амэрыканскіх спэцслужбаў.
«Мы ведаем пра гэта зь мінулага досьведу, і я гарантую вам, што я ведаю, што гэта адбываецца цяпер, таму што я цяпер зноў атрымліваю брыфінгі [выведкі]. Расейцы па-ранейшаму спрабуюць пазбавіць легітымнасьці наш выбарчы працэс. Гэта факт», — заявіў Байдэн.
ГЛЯДЗІЦЕ ТАКСАМА: Расея актыўна ўмешвалася ў выбары 2016 году, — справаздача Сэнату ЗШАПаводле яго, Кітай таксама правёў мерапрыемствы, «накіраваныя на тое, каб мы страцілі ўпэўненасьць у выніках выбараў 2020 году».
Адразу некалькі амэрыканскіх спэцслужбаў у свой час пацьвердзілі, што Расея ў 2016 годзе ўмешвалася ў выбары прэзыдэнта ЗША з мэтай дапамагчы Дональду Трампу. У Маскве гэта абвінавачваньне адмаўляюць, а сам Трамп неаднаразова называў такія паведамленьні «фальшыўкай».