Кніга «Паўстаньне масаў» філёзафа Артэгі-і-Гасэта, якую згадаў Бабарыка, зьнікла з кнігарняў

Выданьня няма ні ў традыцыйных кнігарнях, ні ў онлайн-крамах.

Кніга «Паўстаньне масаў», пра якую казаў прэтэндэнт у кандыдаты Віктар Бабарыка, стала вельмі папулярнай у Беларусі — набыць яе цяпер вельмі складана. Карэспандэнт Свабоды змог зрабіць сёньня замову толькі на сайце biblio.by праз тэлефон. На самім сайце спасылка на кнігу была недасяжная.

На папулярным сайце oz.by адказалі, што кніга «Паўстаньне масаў» гішпанскага філёзафа Хасэ Артэгі-і-Гасэта зьнятая з продажу.

«На жаль, пазыцыя зьнятая з продажаў і ў гэты момант да замовы недаступная з прычыны сканчэньня накладу ў нашага пастаўніка. У сувязі з гэтым тавар аўтаматычна выдалены з каталёгу. Пра новыя тэрміны пастаўкі інфармацыі няма», — паведамілі на сайце oz.by.

ГЛЯДЗІЦЕ ТАКСАМА: «Альбо мы зробім нашу рэвалюцыю надзеі мірна, без крыві, альбо „Чаўшэску“» — вялікае інтэрвію зь Віктарам Бабарыкам

На папулярным сайце wildberries.by «Паўстаньня масаў» няма. «У гэты момант такой кнігі няма ў наяўнасьці. Тэрміны паступленьня вы можаце глядзець у сьпісе чаканьня», — кажуць там.

Тым часам на сайце расейскага выдаўца АСТ паведамляюць, што выданьне можна купіць у кнігарнях «Белкнігі». Дырэктар «Белкнігі» Аляксандар Вашкевіч сказаў карэспандэнту Свабоды, што на гэты момант «Паўстаньня масаў» няма ў продажы.

«Гэта кніга расейскага выдавецтва АСТ. У іх там нешта зьвязана з карантыннымі захадамі. Мы яе замаўлялі з 2017 году і вельмі многа прадалі. Але цяпер праблемы з расейскай адгрузкай. Цяпер гэтай кнігі няма ў нашых крамах», — сказаў Аляксандар Вашкевіч.

Паводле зьвестак у інтэрнэце, 7 кніг яшчэ заставаліся ў менскай кнігарні «Цэнтральнай» і па адным асобніку яшчэ ў некалькіх крамах. Але і там кніга не знайшлася. У краме «Цэнтральнай» адказалі праз тэлефон, што «гэтую кнігу вынялі з продажу».

«Учора мы яе прадалі».

ГЛЯДЗІЦЕ ТАКСАМА: «Называць замежныя апэрацыі вывадам грошай — абсурд». Што ня так з абвінавачаньнямі Бабарыку, якія паказалі ў тэлевізіі

У вядомай менскай кнігарні «Акадэмкніга» кнігі «Паўстаньне масаў» таксама няма ў продажы, хоць ёю цікавяцца студэнты.

Віктар Бабарыка згадаў «Паўстаньне масаў» у інтэрвію tut.by.

«Тое, што скажуць мне зрабіць выбарнікі, я жвавенька гэта зраблю. Калі мае выбарнікі скажуць: ідзем на плошчу, я пайду на плошчу. Калі мае выбарнікі скажуць нешта зрабіць па-іншаму... Мне здаецца, што мы забываемся, што ў ніводнай краіне сьвету, пачытайце кнігу „Паўстаньне масаў“, ніводзін дыктатарскі рэжым ня можа ўтрымацца, калі ў яго няма электаральнай большасьці. Ён можа ўтрымацца кароткі час на крыві, толькі на крыві. Калі хтосьці гатовы ўзяць на сябе адказнасьць за праліцьцё крыві, а гэта ня я казаў, што буду расстрэльваць людзей, то гэта будзе яго адказнасьць», — заявіў Бабарыка.

Перасьлед Віктара Бабарыкі і яго прыхільнікаў. Што важна ведаць

Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
Віктар Бабарыка віны не прызнае.

Хроніка перасьледу

10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
12 чэрвеня Лукашэнка заявіў, што Бабарыка таксама датычны да справы, маўляў, «гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
Фігурантамі «справы „Белгазпрамбанку“» сталі каля 20 чалавек.
15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
Штаб Бабарыкі падрыхтаваў да здачы 435 тысяч подпісаў.
20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
12 ліпеня стала вядома, што Бабарыку этапавалі ў ПК №1 у г. Наваполацак.
12 кастрычніка з ізалятараў выйшлі некалькі чалавек, затрыманых у справе «Белгазпрамбанку». Ім зьмянілі меру стрыманьня, але іншыя падрабязнасьці справы невядомыя.
У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.