Прэтэндэнт на пасаду прэзыдэнта Беларусі Валер Цапкала ў інтэрвію расейскаму агенцтву РИА Новости асудзіў затрыманьне свайго канкурэнта на выбарах Віктара Бабарыкі і заклікаў беларускія ўлады да «сумленнай гульні».
На пытаньне, ці можна разглядаць як пасьлядоўныя зьвёны аднаго ланцуга затрыманьні блогера Сяргея Ціханоўскага і Віктара Бабарыкі, Цапкала сказаў, што «прынамсі, гэта выглядае так».
«Падобна да таго, што ў вачах большай часткі насельніцтва Беларусі гэта выглядае як зьвёны аднаго ланцуга», — сказаў Цапкала.
«Мы асуджаем затрыманьне (Віктара Бабарыкі. — РС)», — сказаў Цапкала і дадаў, што такая ацэнка падзей выцякае зь ягонай «прынцыповай пазыцыі ў пытаньнях так званых эканамічных злачынстваў», якой ён прытрымліваўся і раней, яшчэ на пасадзе кіраўніка адміністрацыі ПВТ.
ГЛЯДЗІЦЕ ТАКСАМА: «Называць замежныя апэрацыі вывадам грошай — абсурд». Што ня так з абвінавачаньнямі Бабарыку, якія паказалі ў тэлевізііНа думку Цапкалы, калі ў праваахоўнікаў ёсьць пытаньне да чалавека ў падатковай або фінансавай сфэры, трэба старанна прааналізаваць сытуацыю, перш чым садзіць яго ў турму.
Паводле Цапкалы, паколькі Віктар Бабарыка відавочна не ўяўляе ніякай пагрозы для грамадзтва, нікуды не ўцячэ, «хай працягвае займацца той дзейнасьцю, якой займаецца, і дае паказаньні, у прысутнасьці адвакатаў». А калі дзяржаве дзейнасьць бізнэсоўца нанесла нейкую шкоду, «дзяржава сваё заўсёды возьме». «Я прыхільнік таго, каб усе пытаньні эканамічнага характару вырашаліся спакойна, за сталом перамоваў», — сказаў Цапкала.
Камэнтуючы абставіны затрыманьня Віктара Бабарыкі і нядопуск да яго адвакатаў 18 чэрвеня, Цапкала заўважыў, што яму «вельмі хочацца, каб паводзіны праваахоўных органаў даказвалі, што мы жывём у 21 стагодзьдзі, у цывілізаванай, сучаснай эўрапейскай краіне».
ГЛЯДЗІЦЕ ТАКСАМА: Кіраўнік замежнай палітыкі Эўразьвязу заклікаў Менск вызваліць БабарыкуПрэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.