Суд Гомельскай вобласьці 12 чэрвеня разгледзеў скаргу Сяргея Ціханоўскага на 15-суткавы арышт. Судзьдзя Васіль Бягун пакінуў у сіле рашэньне суду Савецкага раёну аб 15-суткавым арышце Ціханоўскага.
УЖЫВУЮ Выбары-2020. Як праходзіць прэзыдэнцкая кампанія падчас пандэміі
Арыштаваны блогер, якога ўжо абвясьцілі палітычным зьняволеным, асабіста не прысутнічаў на працэсе, яго дапытвалі па відэасувязі зь Менску.
«У кожным зь месцаў у Мёрах і Салігорску было ня менш за 10 чалавек, значыць, гэта зьяўляецца мітынгам», — патлумачыў судзьдзя Васіль Бягун вырак за тое, што Ціханоўскі называў здымкамі інтэрвію.
Рашэньне суду прысутныя сустрэлі крыкамі «Ганьба».
У судзе падчас разгляду скаргі Сяргея Ціханоўскага 12 чэрвеня ў Гомлі
Сяргей Ціханоўскі падаў хадайніцтва аб правядзеньні відэаздымкі падчас паседжаньня, але судзьдзя адхіліў яго. Прысутныя ў залі прасілі судзьдзю павярнуць манітор у залю, бо яны ня бачаць блогера. Але судзьдзя адказаў: «Каму там яго ня бачна? Можаце выйсьці з залі, вас ніхто не трымае!»
У скарзе Сяргей напісаў, што лічыць 15-суткавы арышт неправамоцным і незаконным, прасіў адмяніць пастанову суду Савецкага раёну Гомля, бо такое рашэньне парушае ягоныя канстытуцыйныя правы — на свабоду сходаў, на свабоду слова. Суд Савецкага раёну Гомля пакараў яго арыштам за сустрэчы з падпісчыкамі ў Салігорску і Мёрах.
«Я сваю скаргу падтрымліваю, хачу дадаць, што ў нас у Беларусі дыктатар Лукашэнка захапіў усе галіны ўлады і забараняе грамадзянам выкарыстоўваць тыя правы, якія нам дае Канстытуцыя. Фабрыкуюцца крымінальныя справы, законы не выконваюцца, мяне судзяць, у нас дзейнічае сваволя. Гэта ня быў мітынг, гэта было інтэрвію, я задаваў пытаньні людзям паасобку, на камэру, пытаўся: „Як вам тут жывецца, якія заробкі?“. У Мёрах было сем чалавек, я іх па чарзе пытаўся, па адным. Гэта ня мітынг, не было транспарантаў, нічога!»
ГЛЯДЗІЦЕ ТАКСАМА: Ціханоўская прыпыніла збор подпісаў у Менску і абласных цэнтрах, асьцерагаючыся правакацый і затрыманьняўЯгоны адвакат Алег Юрчанка таксама заявіў, што не было мітынгу, «было інтэрвію, якое мой падабаронны браў у людзей. Калі недзе ёсьць людзі, то гэта ня значыць, што гэта мітынг, людзі ў населеным пункце павінны ж быць».
«Супрацоўнік міліцыі нёс пакункі з крамы, у форме, і нават не зьвярнуў увагу на гэта ў Мёрах — ня бачыў ніякага мітынгу. Ніхто нічога не завуаляваў, ніякі мітынг, як напісалі ў пастанове суду», — дадаў Юрчанка.
«Ціханоўскі ўсклаў на сябе такую адказнасьць — браць інтэрвію ў людзей, артыкул 33 Канстытуцыі дазваляе яму гэта рабіць, а суд палічыў, што ён павінен быў атрымаць дазвол на мітынг. Які дазвол, калі гэта ня мітынг?» — пракамэнтаваў адвакат.
Маці Сяргея Ціханоўскага Соф'я Яфрэмаўна ў судзе (справа)
Прысутныя прасілі супрацоўнікаў суду дазволіць маці Ціханоўскага Соф’і Яфрэмаўне ўбачыць сына. Суд адмовіў, больш за тое — у залю запрасілі міліцыю.
«Для чаго вы паклікалі міліцыю, палохаць нас?» — пачалі крычаць у залі.
«Мы прывялі міліцыю, каб быў парадак!» — сказала сакратарка.
Пасьля абурэньня людзей усё-ткі міліцыю вывелі з залі.
ГЛЯДЗІЦЕ ТАКСАМА: «У шоку, што людзей за сустрэчы адпраўляюць на суткі». Што казаў Ціханоўскі сёньня ў судзеЗатрыманьні Ціханоўскага і яго прыхільнікаў. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- 14 сьнежня 2021 году Сяргея Ціханоўскага асудзілі на 18 гадоў зьняволеньня, прызнаўшы вінаватым паводле чатырох артыкулаў Крымінальнага кодэксу: ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варожасьці); ч. 2 арт. 191 (перашкода працы ЦВК, заяву на яго падала старшыня ЦВК Лідзія Ярмошына), ч. 1 арт. 342 (арганізацыя дзеяньняў, што груба парушаюць грамадзкі парадак).
- Пасьля прысуду Ціханоўскі спачатку трапіў у папраўчую калёнію № 15 Магілёва. Але ў жніўні 2022-га яму ўзмацнілі рэжым і перавялі на 3 гады ў турму № 8 у Жодзіне, дзе зноў судзілі і дадалі яшчэ 1,5 года зьняволеньня за «непадпарадкаваньне патрабаваньням адміністрацыі». Агулам тэрмін зьняволеньня Сяргея Ціханоўскага цяпер складае 19,5 года.
- З сакавіка 2023 году сваякі Сяргея Ціханоўскага не атрымліваюць аніякай інфармацыі ад яго.
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.