Выбары-2020

Пасьля 30 сутак арышту паплечнік Ціханоўскага па-ранейшаму за кратамі

6 чэрвеня мусіў выйсьці на волю Юры Уласаў — жыхар Гомеля, паплечнік блогера Сяргея Ціханоўскага. У ізалятары часовага ўтрыманьня (ІЧУ) ён адсядзеў месяц — двойчы запар быў пакараны 15-суткавым арыштам. Але дома ён так і не зьявіўся.

УЖЫВУЮ Выбары-2020. Як праходзіць прэзыдэнцкая кампанія падчас пандэміі

«Мы чакалі яго ля ІЧУ. У 18.00 Юра мусіў быў выйсьці. Ня выйшаў. Супрацоўнікі ізалятару сказалі, што ў 17.30 яго вывезла міліцыя на „газэлі“. Дома ён не зьявіўся, пачалі шукаць, тэлефанаваць па аддзелах. У выніку ўжо пасьля 22.00 жонцы Юры пацьвердзілі, што ён зноў у ІЧУ — у межах адміністрацыйнага працэсу, якога менавіта — не сказалі. У панядзелак будзе чарговы суд», — распавёў Свабодзе Аляксей, сябар Уласава.

ГЛЯДЗІЦЕ ТАКСАМА: Паплечнікаў Ціханоўскага не выпускаюць з-за кратаў — дадаюць яшчэ 15 сутак

Юры Ўласаў быў затрыманы пасьля акцыі падтрымкі Сяргея Ціханоўскага 7 траўня ў Гомлі. Суд пакараў яго арыштам на 15 сутак. З ІЧУ яго зноў прывозілі на суд — таемна, і прысудзілі яшчэ 15 сутак.

Затрыманьні Ціханоўскага і яго прыхільнікаў. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».

  • На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
  • Ціханоўскага трымаюць за кратамі з 29 траўня 2020 году. Яго абвінавачваюць паводле чатырох артыкулаў Крымінальнага кодэксу:

ч. 1 арт. 293 (арганізацыя масавых беспарадкаў, да 15 гадоў зьняволеньня).

ч. 3 арт. 130 (распальваньне сацыяльнай варожасьці);

ч. 2 арт. 191 (перашкода працы ЦВК). Заяву на яго падала старшыня ЦВК Лідзія Ярмошына;

ч. 1 арт. 342 (арганізацыя дзеяньняў, што груба парушаюць грамадзкі парадак).