У Сэнаце ЗША падрыхтаваны законапраект пра новыя санкцыі супраць кампаній, якія ўдзельнічаюць у будаўніцтве газаправоду «Паўночны паток-2».
Дакумэнт падрыхтавалі сэнатары ад абедзьвюх партый — рэспубліканец Тэд Круз і дэмакратка Джын Шагін. Яны былі і суаўтарамі папраўкі да закону аб вайсковых выдатках ЗША, прынятаму ў сьнежні летась, згодна з якой пад санкцыі павінны патрапіць кампаніі, якія займаюцца кладкай труб для газаправоду па дне Балтыйскага мора. З прычыны пагрозы санкцый праца над «Паўночным патокам-2» была спыненая.
ГЛЯДЗІЦЕ ТАКСАМА: Нямеччына адмовілася вызваляць «Паўночны паток — 2» ад газавай дырэктывыНовы законапраект прадугледжвае ўвядзеньне санкцый ня толькі супраць кампаній, якія непасрэдна займаюцца кладкай труб, але і супраць тых, хто аказвае ім юрыдычную дапамогу ці страхавыя паслугі. Reuters прыводзіць словы Круза аб тым, што законапраект прадугледжвае, што кампаніі «зьвязаныя з судамі, якія ўдзельнічаюць у будаўніцтве газаправоду, неадкладна сутыкнуцца з разбуральнымі санкцыямі».
ГЛЯДЗІЦЕ ТАКСАМА: Кангрэс ЗША ўхваліў санкцыі з мэтай заблякаваць расейскі «Паўночны паток – 2»Паводле ацэнак Bloomberg, засталося дабудаваць каля 6 працэнтаў трубаправоду — гэта крыху больш за 100 кілямэтраў.
ЗША выступаюць супраць праекту, сьцьвярджаючы, што ён робіць Эўропу празьмерна залежнай ад расейскага газу і, такім чынам, уразьлівай. Такую самую пазыцыю падзяляюць Украіна і шэраг краін Эўразьвязу. Нямеччына, Аўстрыя і шэраг іншых краін, кампаніі якіх удзельнічаюць у будаўніцтве, настойваюць, што гаворка ідзе выключна пра бізнэс-праект.