Кіргізстан сьледам за Беларусьсю і Армэніяй просіць Расею зьнізіць цану на газ

Урад Кіргізстану вядзе перамовы з расейскім бокам аб зьніжэньні цаны на прыродны газ, заявіў віцэ-прэм’ер гэтай краіны Эркін Асрандзіеў, якога цытуе кіргіскі фінансавы партал Акчабар.

Як паведамляе tut.by са спасылкай на дзяржаўны камітэт прамысловасьці і энэргетыкі Кіргізстану, міністру энэргетыкі Расеі Аляксандру Новаку накіраваны ліст з просьбай аб зьніжэньні цаны на прыродны газ для Кіргізстану са 150 да 100 даляраў за тысячу кубамэтраў і аб заключэньні кантракту ў рублёвым эквіваленце.

ГЛЯДЗІЦЕ ТАКСАМА: Пуцін адмовіў Лукашэнку: Расея ня будзе зьніжаць тарыфы на транспартаваньне газу

Раней два іншыя удзельнікі Эўразійскага эканамічнага саюзу (ЭАЭС) — Армэнія і Беларусь — прасілі ў Масквы зьнізіць цану на газ. Цяпер цана расейскага газу для Беларусі складае 127 даляраў за тысячу кубамэтраў, для Армэніі — 165 даляраў.

Беларусь — найбуйнейшы спажывец расейскага газу ў ЭАЭС, штогадовы абʼём імпарту — каля 20 мільярдаў кубамэтраў. У студзені-сакавіку 2020 году Беларусь зьнізіла імпарт расійскага газу на 11% у параўнаньні з аналягічным пэрыядам 2019 году. Падчас цёплай зімы імпарт газу таксама зьнізілі некаторыя эўрапейскія спажыўцы.

ГЛЯДЗІЦЕ ТАКСАМА: Нямеччына зрабіла для «Газпрома» выключэньне з эўрапейскіх газавых правілаў

Попыт зьнізіўся і праз пандэмію каранавірусу. Tut.by адзначае, што ў выніку 21 траўня цана газу ў Эўропе ўпала да ўзроўню цаны «на сьвідравіне» у Расеі — 34 даляры за тысячу кубамэтраў. У РФ газ каштуе столькі толькі ў адным рэгіёне краіны — Ямала-Ненецкай аўтаномнай акрузе, дзе значную частку расейскага газу і здабываюць.

Аляксандр Лукашэнка неаднаразова прапаноўваў уладам Расеі розныя варыянты зьніжэньня цаны на газ. У прыватнасьці, Менск хацеў зьнізіць тарыф на транспартаваньне газу, паколькі ў канчатковай цане газу для Беларусі на долю транспартных выдаткаў прыпадае больш за 70%.

ГЛЯДЗІЦЕ ТАКСАМА: Лукашэнка расказаў калегам з ЭАЭС, як Беларусь цярпіць ад карантыну, абвешчанага суседзямі

Аднак на нядаўнім пасяджэньні Вышэйшага Эўразійскага эканамічнага савету прэзыдэнт РФ Уладзімір Пуцін заявіў, што адзіны тарыф на транспартаваньне газу «можа быць рэалізаваны на адзіным рынку з адзіным бюджэтам і адзінай сыстэмай падаткаабкладаньня».

ГЛЯДЗІЦЕ ТАКСАМА: Брытанская кампанія прапанавала першы ў сьвеце праект ацяпленьня дамоў вадародам