У Гомлі памерла 58-гадовая настаўніца пачатковых клясаў Марыя К. Яна працавала ў сярэдняй школе № 61. Па словах бацькоў школьнікаў, апошнім часам настаўніца была на апараце штучнай вэнтыляцыі лёгкіх і хварэла на каранавірус.
Пра сьмерць настаўніцы паведамілі «Cильные новости». Школа № 61 па стане на 18 траўня працавала. Бацькі, якія забіралі дзяцей — вучняў малодшых клясаў, з групы падоўжанага дня, пацьвердзілі сьмерць настаўніцы.
Дырэктар школы знаходзіцца на бальнічным — паведамілі ў адміністрацыі. Якая прычына бальнічнага — адмовіліся казаць.
«Мы водзім дзяцей у школу. Наша дзіцё вучыцца ў паралельнай той клясе, дзе памерла сёньня настаўніца. Але мы лічым, што школа — бясьпечнае месца для дзяцей. Карантыну ж не ўводзілі, усе мы ходзім на працу, у краму, дзеці гуляюць на пляцоўках», — выказалася адна з маці.
Намесьнік дырэктара адмовілася ад камэнтароў. «Зразумейце — у нас гора. Мы нічога ня будзем камэнтаваць. Усе спачуваньні мы выкажам блізкім людзям», — зазначыла намесьнік дырэктара.
«Яна была вельмі добрым чалавекам, вельмі! Пра яе можна сказаць толькі ўсё самае лепшае. Але я не магу больш нічога распавядаць вам», — сказала адна з выхавацелек групы падоўжанага дня.
Гэтая публікацыя падрыхтаваная з выкарыстаньнем інфармацыі БелаПАН
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ