Алена Давыдава, фэльчарка і грамадзкая актывістка з каманды «кандыдатаў пратэсту» Мікалая Статкевіча, з прыгодамі дабіралася з Гомля да Менску, каб пасьпець падаць дакумэнты на рэгістрацыю ўласнай ініцыятыўнай групы да прэзыдэнцкіх выбараў.
Вечарам 13 траўня яе спрабавалі затрымаць у Гомлі мэдыкі — на той падставе, нібыта ёй тэрмінова трэба здаць аналіз на каранавірус і сысьці ў самаізаляцыю.
Алена Давыдава выскачыла з дому праз вакно і з дапамогай сяброў усё-ткі дабралася да Менску.
Пра падрабязнасьці Свабодзе расказаў Аленін муж Канстанцін.
ГЛЯДЗІЦЕ ТАКСАМА: Ужо 34 «кандыдаты ў кандыдаты». Хто падаў дакумэнты на рэгістрацыю ініцыятыўных групаўАлена Давыдава працуе фэльчарам на хуткай дапамозе.
«Наступная зьмена ў Алены ў суботу. Але кіраўніцтва спрабавала перанесьці зьмену менавіта на чацьвер, каб яна не пасьпела падаць дакумэнты ў ЦВК. Алена адмовілася.
Каля 17.00 да яе дому прыехалі мэдыкі ў засьцерагальных касьцюмах і патрабавалі, каб яна здала аналіз на каранавірус — нібыта яна трапіла ў „кантакт“ і яе трэба тэрмінова ізаляваць. Хоць на апошняй зьмене яна не перавозіла нікога з падазрэньнем на інфэкцыю. Алена з дому ня выйшла. Тыя мэдыкі пагражалі выклікаць міліцыю і ўзяць аналіз прымусова. Яна выскачыла праз вакно, прабіралася заднімі дварамі і з дапамогай сяброў усё-ткі трапіла ў Менск», — расказаў муж патэнцыйнай кандыдаткі.
Ён лічыць, што «спэцапэрацыю» арганізавалі дзеля таго, каб Алена Давыдава не пасьпела здаць дакумэнты на рэгістрацыю ініцыятыўнай групы.
Патэнцыйная кандыдатка здолела падаць паперы ў Цэнтральную выбарчую камісію.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.