Пісьменьніца з Уханю Фан Фан вяла дзёньнік падчас карантыну. У чэрвені пабачыць сьвет яго ангельскі і нямецкі пераклады. У Кітаі аўтарка стала аб’ектам вострай крытыкі нацыяналістаў.
Фан Фан — гэта псэўданім пісьменьніцы Ван Фанг, 64-гадовай ляўрэаткі прэстыжных кітайскіх літаратурных прэміяў.
«Сьмерць штораз бліжэй і бліжэй. Памёр кузэн суседа, потым малодшы брат знаёмай. У сябра памёр бацька, пасьля памерла ягоная маці і жонка, а затым памёр і ён сам. Калі людзі навокал плачуць, мне самой цяжка плакаць».
Гэта адзін з допісаў гучнага інтэрнэт-дзёньніка з закрытага гораду. Ад студзеня яго чыталі мільёны людзей, і гэтыя допісы падзялілі Кітай. Адныя хваляць Фан за апісаньне індывідуальных пакутаў падчас эпідэміі, а іншыя абвінавачваюць у здрадзе краіны. На думку апошніх, «Wuhan Diary» — гэта ідэальны аргумэнт для Захаду, які сёньня вінаваціць Кітай у грэбаваньні праблемай і заражэньні ўсяго сьвету.
Fang Fang%27s supporters in China are under virulent attack because her "Wuhan Diary" speaks out against social injustice and abuse of power that impeded China’s response to the coronavirus outbreak, while praising Wuhan’s 9 million residents. https://t.co/a2YbN74ZeZ pic.twitter.com/nIwhVRctQr
— Kenneth Roth (@KenRoth) May 3, 2020
Пра папулярнасьць дзёньніка ў Кітаі сьведчыць 380 мільёнаў пераходаў на профіль пісьменьніцы ў Weibo, кітайскім аналягу Twitter, дзе і зьяўляліся допісы. Некаторыя зьнікалі праз пару хвілінаў, бо іх зьнішчала кітайская цэнзура.
Фан Фан мела абмежаваны доступ да навінаў. У дзёньніку яна цытуе размовы са знаёмымі, уражаньні з рэдкіх шпацыраў па горадзе, свае ўласныя думкі.
24 сакавіка ва Ўхані скончыўся карантын. Паводле афіцыйных дадзеных, каранавірусам там заразіліся больш за 50 тысяч чалавек, а памерлі 3869.
ГЛЯДЗІЦЕ ТАКСАМА: «У камэнтарах пісалі, што мяне трэба ізаляваць». Дзяўчына з Уханю вярнулася ў Беларусь пасля карантыну ў ЦюменіАўтарка закрыла свой дзёньнік, дадаўшы, што гэта яшчэ не канец.
«Я не перастану пісаць і дамагацца, каб вінаватыя былі пакараныя. Незалежна ад таго, што думаюць наверсе, мы, жыхары Ўханю, зачыненыя ў дамах больш за два месяцы, як сьведкі трагічнага моманту ў нашым горадзе, абавязаныя патрабаваць справядлівасьці ад імя тых, хто загінуў без патрэбы».
«Кажуць, што многія толькі цяпер прачынаюцца; яны зьдзіўленыя, бо раптам зразумелі, што скандаваньне пустых лёзунгаў зноў і зноў пра тое, наколькі дзівосная гэтая краіна, ня мае ніякага сэнсу. Яны ўбачылі поўную бессэнсоўнасьць дзеячаў, якія марнавалі час на курсах палітычнай думкі і лілі ваду, замест таго, каб дзейнічаць», — напісала яна 4 лютага.
На Захадзе «Дзёньнік з Уханю» выйдзе ў чэрвені ў выдавецтве Harper Collins, якое належыць мэдыямагнату Рупэрту Мёрдаку.