«Хуткая», лекары ў «скафандрах» і закрытыя службы. Што адбываецца ў жаночым манастыры ў Горадні. ФОТА

Сьвецкіх людзей не пускаюць на багаслужбы ў манастыр Нараджэньня Багародзіцы ў Горадні. Лекары «хуткай» у ахоўным рыштунку прыяжджалі ў манастыр 29 красавіка.

Свабода спрабавала разабрацца, што адбываецца ў праваслаўных манашак.

Каранавірус у Беларусі і ў сьвеце. Як разьвіваюцца падзеі >>

Мэдыкі ў рыштунку на сходах у горадзенскі жаночы праваслаўны манастыр, 29 красавіка

На ўваходзе ў жаночы манастыр зьявілася абвестка пра тое, што службы адбываюцца «толькі ў прысутнасьці манашак». Такое рашэньне было прынята, як напісана, па дабраслаўленьні мітрапаліта Менскага і Заслаўскага Паўла.

Абвестка на ўваходзе ў манастыр

Да таго ж у абвестцы паведамляецца, што манашкі штодня моляцца аб абароне «Белай Русі» ад «цяперашняга выпрабаваньня», каб паправіліся тыя, хто хварэе, каб узмацніліся сілы мэдыкаў, «якія робяць подзьвіг дзеля дабра людзей».

«У нашым манастыры ўсё спакойна, аднак просім усіх вас паставіцца з разуменьнем да вымушаных захадаў бясьпекі», — гаворыцца далей у паведамленьні для вернікаў.

Манастыр у гонар Нараджэньня Прасьвятой Багародзіцы ў Горадні

Брама і ўваход у вітальню манастыра адчыненыя. Вернікі прыходзяць, каб аддаць запіскі або ахвяраваньні. У вітальні сядзіць сталая жанчына ў мэдычнай масцы на твары, яна прымае запіскі. На пытаньне, ці праходзяць цяпер багаслужбы ў манастыры, жанчына адказала, што толькі ў прысутнасьці манашак. Гэта значыць, у храме могуць прысутнічаць толькі манашкі, але ня сьвецкія вернікі.

У вітальні манастыра

На пытаньне, ці зьвязана гэта з тым, што нехта захварэў, прыдзьверная абурылася.

«А навошта вам?», — удакладніла яна.

На тлумачэньне, што цяпер актуальная сытуацыя з захворваньнямі, жанчына адказала: «Добра, значыць, захворваюць, мы лечымся. Хто трэба, той лечыцца», — дадала яна, перанакіравала да кіраўніцтва і папрасіла выйсьці.

Манастырскі ахоўнік Ігар патлумачыў, што сьвецкіх папрасілі не наведваць службы ад мінулай нядзелі. У гэтыя дні, у тым ліку на Радаўніцу, вернікі толькі прыносілі запіскі і ахвяраваньні.

Ахоўнік Ігар

Ахоўнік дадаў, што забарона на ўдзел у багаслужбах сьвецкіх зьвязаны «з агульнымі мерапрыемствамі», што гэта прафіляктычныя захады.

На пытаньне, чаму іншыя цэрквы не абмяжоўваюць наведваньня службаў, ён патлумачыў: у манастыры ёсьць манашкі 80-90 гадоў, «гэта вельмі небясьпечна».

Вернікі прыходзяць з запіскамі і ахвяраваньнямі

Ахоўнік дадаў, што ў жаночым манастыры служаць мясцовыя сьвятары. На пытаньне, ці не прыяжджаюць сьвятары з Жыровіцкага манастыра, адказаў так:

«Не, гэта на Вялікдзень, матушка там, каб мужчынскі хор сэмінарыстаў... Гэта чыста такое... Тут усё сваё, свой хор».

Журналістаў папрасілі выйсьці за межы манастыра

У гэты час да манастыра пад’ехала хуткая дапамога, зь яе выйшлі два чалавекі ў спэцвопратцы з мэдычнымі скрынямі і зайшлі ўсярэдзіну. Праз хвілін 15 мэдыкі выйшлі і зьехалі.

ГЛЯДЗІЦЕ ТАКСАМА: З манастыра і сэмінарыі ў Жыровічах шпіталізавалі больш за 40 чалавек

Прэсавы сакратар Беларускай праваслаўнай царквы айцец Сергій Лепін на пытаньне, ці зьвязаныя згаданыя захады з выяўленьнем каранавірусу ў манастыры або тым, што захварэў архіепіскап Гурый, адказаў Свабодзе афіцыйным паведамленьнем, якое месьціцца на сайце манастыра ў гонар Нараджэньня Прасьвятой Багародзіцы. Тэкст публікацыі паўтарае абвестку на дзьвярах манастыра. Айцец Сергій Лепін удакладніў, што гэта ўся інфармацыя, якую даў горадзенскі манастыр прэс-службе экзархату.

ГЛЯДЗІЦЕ ТАКСАМА: 2 маюць COVID-19, 2 чакаюць вынікаў аналізаў, 5 клірыкаў на бальнічным. Што адбываецца ў Сьвята-Елізавецінскім жаночым манастыры ГЛЯДЗІЦЕ ТАКСАМА: Колькі людзей было ў Петрапаўлаўскім саборы, калі яго сьвятар паміраў ад каранавірусу. ФОТА