Кампанія А1 падтрымала ініцыятыву Фонду ААН у галіне народанасельніцтва і аб’яднаньня «Гендэрныя пэрспэктывы» зрабіць званкі на агульнанацыянальную гарачую лінію для пацярпелых ад хатняга гвалту 8-801-100-8-801 бясплатнымі для сваіх абанэнтаў. Перамовы пра гэта вядуцца і зь іншымі беларускімі апэратарамі мабільнай сувязі MTC і life:).
Кіраўніца агульнанацыянальнай гарачай ліні для пацярпелых ад хатняга гвалту 8-801-100-8-801 Ганна Коршун у 5 тэзісах патлумачыла, чаму гэта важна, як гэта працуе, як можа паўплываць на колькасьць зваротаў на лінію ў часе пандэміі.
Каранавірус у Беларусі і ў сьвеце. Як разьвіваюцца падзеі >>
Беларуская гарачая лінія для пацярпелых ад хатняга гвалту працуе 8 гадоў з 8 раніцы да 8 вечара без выходных і сьвяточных дзён
Ганна Коршун
Агульнанацыянальная гарачая лінія для пацярпелых ад хатняга гвалту 8-801-100-8-801, якая дзейнічае на базе абʼяднаньня «Гендэрныя пэрспэктывы», працуе з 2012 году пры падтрымцы фонду ААН. Гэта ўнікальны сэрвіс, які спэцыялізуецца на псыхалягічнай, юрыдычнай і сацыяльнай дапамозе ўсім паўналетнім, пацярпелым ад хатняга гвалту на тэрыторыі Беларусі. Усе паслугі бясплатныя, ананімныя і канфідэнцыяльныя. Іх прапануюць 6 кваліфікаваных спэцыялістаў — 4 псыхолягі і 2 юрысты. Лінія працуе з 8 раніцы да 8 вечара без выходных і сьвяточных дзён, выключэньне адзін дзень на год — 1 студзеня, калі лінія не працуе.
ГЛЯДЗІЦЕ ТАКСАМА: Дэлегацыя Швэцыі наведала ў Менску офіс гарачай лініі для пацярпелых ад хатняга гвалту
Падобныя гарачыя лініі ў многіх краінах сьвету бясплатныя
Падобная лініі бясплатныя ва Ўкраіне, Малдове ды іншых краінах сьвету. У 2014 годзе ўсе мабільныя апэратары адкрылі доступ сваіх абанэнтаў да паслуг гарачай лініі. «Белтэлекам» ад самага пачатку зрабіў званкі са стацыянарнага тэлефона на гарачую лінію бясплатнымі. Званкі з мабільных апэратараў заставіліся платнымі. У 2016 годзе адбыўся прыкметны рост званкоў з мабільных тэлефонаў. Да 2020 году тэндэнцыя дасягнула піку. Цяпер 90% званкоў на гарачую лінію — з мабільных тэлефонаў. На працягу некалькі гадоў высоўвалася ініцыятыва зрабіць званкі бясплатнымі. Гэтыя перамовы цягнуліся некалькі гадоў. І цяпер першы апэратар сотавай сувязі А1 зрабіў гэта.
Тры прычыны, чаму званок з мабільнага на гарачую лінію павінен быць бясплатным
- Паводле статыстыкі, 94% званкоў на гарачую лінію — ад жанчын, якія цярпяць ад хатняга гвалту. Калі чалавек тэлефануе з мабільнага, ёсьць шэраг абмежаваньняў для паўнавартаснага кансультаваньня, бо званкі з мабільных лімітаваныя; як толькі канчаюцца грошы, званок спыняецца. Мы ніколі ня ведаем, на якім этапе кансультаваньня ён спыніцца. Званкі, зьвязаныя з хатнім гвалтам, як правіла, вельмі траўматычныя, маюць працяглы характар.
- Званіць па мабільным тэлефоне лепш, чым па стацыянарнай лініі, бо пацярпелая павінна знаходзіцца ў бясьпечным, зручным месцы, калі няма непажаданых сьведак ці слухачоў, калі няма побач агрэсара.
- Узровень дабрабыту абанэнтаў самы розны, і ня ўсе людзі маглі дазволіць сабе званок з мабільнага тэлефона. Гэта было абмежаваньнем, званок трэба было аплачваць, і таму ня ўсе маглі карыстацца паўнавартаснай працяглай кансультацыяй, як таго патрабавала сытуацыя.
Цяпер усе абмежаваньні зьнятыя. Мы спадзяёмся, што іншыя беларускія апэратары падтрымаюць гэту ініцыятыву.
ГЛЯДЗІЦЕ ТАКСАМА: Сьвет зачынены ў дамах. Павялічваецца хатні гвалт
Чаму не назіраецца павелічэньня званкоў пра хатні гвалт
Супрацоўніца гарачай лініі.
Мы ня можам меркаваць аб маштабах хатняга гвалту ў краіне. Мы можам апэраваць толькі дадзенымі нашай гарачай лініі. Няма павелічэньня. У лютым і сакавіку мы атрымлівалі сярэднюю для гэтага пэрыяду колькасьць званкоў. Пакуль мы ня бачым тэндэнцыі. Важным фактарам зьяўляецца адсутнасьць афіцыйнага карантыну ў краіне. Людзі працягваць працаваць на дзяржаўных прадпрыемствах, заводах. Дзеці павінны ісьці ў школу. Краіна жыве жыве ў ранейшым тэмпе, і толькі часткі кампаній (ІТ-сфэра, міжнародныя кампаніі ды некаторыя іншыя дазволілі сваім супрацоўнікам працаваць дыстанцыйна). Мы мяркуем, што з пагаршэньнем эпідэміялягічнай сытуацыі найхутчэй людзі будуць проста вымушаныя заставацца дома з прычыны хваробы. Магчыма, мы атрымаем павелічэньне званкоў.
ГЛЯДЗІЦЕ ТАКСАМА: Хто і як дапамагае ахвярам хатняга гвалту ў Беларусі. Дакумэнтальны фільм
Чаму гэтая ініцыятыва цяпер такая актуальная
У пэрыяд пандэміі і самаізаляцыі праблема хатняга гвалту абвастраецца. Жанчыны і дзеці вымушаныя праводзіць з агрэсарамі нашмат больш часу, чым раней, ім няма куды ісьці і няма дзе хавацца.
Калі вы сутыкнуліся з праявамі фізычнага, псыхалягічнага, сэксуальнага альбо эканамічнага гвалту ў сямʼі, цяпер можна бясплатна тэлефанаваць па тэлефоне агульнанацыянальнай гарачай лініі для пацярпелых ад хатняга гвалту 8-801-100-8-801 не толькі з гарадзкога нумару, але і зь любога абанэнцкага нумару А1. Такім чынам, у тых, хто апынуўся ў складанай жыцьцёвай сытуацыі, зьявіцца больш магчымасьцяў атрымаць своечасовую дапамогу — сацыяльную, псыхалягічную і юрыдычную.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ