Паводле дадзеных на 20 красавіка ў Беларусі зарэгістраваныя 6264 станоўчыя тэсты на COVID-19, паведаміла Міністэрства аховы здароўя Беларусі ў Тэлеграме.
Сярод іх
- у Менску — 3023,
- Віцебскай вобласьці — 1504,
- Менскай — 789,
- Гомельскай — 322,
- Магілёўскай — 265,
- Берасьцейскай вобласьці — 185,
- Горадзенскай — 176.
Як удакладняе Мінздароўя, на раніцу 18 красавіка было зарэгістравана 518 новых выпадкаў, на раніцу 19 красавіка — 510, за апошнія суткі — 457 выпадкаў. 18 і 19 красавіка міністэрства не называла колькасьць новых выпадкаў заражэньня каранавірусам у Беларусі.
На 20 красавіка памёр 51 пацыент «з шэрагам хранічных захворваньняў з выяўленай каранавіруснай інфэкцыяй» — 4 выпадкі за апошнія суткі (19 красавіка паведамлялі пра 47 сьмерцяў).
Выздаравелі і выпісаныя 514 чалавек, у цяжкім стане — 92 чалавекі.
З пачатку лютага ў Беларусі правялі 102 556 тэстаў на каранавірус.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ