Расейская кампанія «Транснефть» пачала пастаўкі сыравіны ў Беларусь. Гэта «Інтэрфаксу» пацьвердзілі ў канцэрне «Белнафтахім».
«Пастаўкі на беларускія НПЗ па сыстэме нафтаправодаў у адпаведнасьці з маршрутнымі даручэньнямі пацьвярджаем», — адзначылі ў ведамстве.
ГЛЯДЗІЦЕ ТАКСАМА: Лукашэнка даручыў «запоўніць нафтасховішчы», пакуль нафта таннаяРаней кіраўніцтва «Транснефти» паведаміла, што чатыры расейскія фірмы пачалі афармленьне маршрутных даручэньняў на пастаўку нафты ў Беларусь. Паводле наяўных зьвестак, падалі заяўкі на пастаўку ў красавіку 1 млн тон нафты.
Сума ўгоды не агучваецца, аднак на момант падпісаньня кантрактаў, паводле беларускага прэм'ера Сяргея Румаса, для Беларусі цана на расейскую нафту гатунку Urals складала 4 даляры за барэль.
У двухбаковых адносінах Беларусі і Расеі адной з асноўных праблем заставалася адсутнасьць ад 1 студзеня кантрактаў на пастаўку нафты на беларускія НПЗ, адзін зь якіх часткова належыць дзьвюм расейскім нафтавым кампаніям — «Роснефти» і «Газпром нефти».
ГЛЯДЗІЦЕ ТАКСАМА: Расея прыняла практычна ўсе ўмовы Беларусі наконт нафты, — пасол Мезенцаў
Невялікія партыі ад пачатку году пастаўлялі толькі структуры бізнэсоўца Міхаіла Гуцэрыева, таксама пачаўся імпарт нафты ў Беларусь праз порты Клайпэды і Адэсы.
Канцэрн «Белнафтахім» разьлічвае, што агулам удасца выйсьці на ранейшыя аб’ёмы перапрацоўкі, давёўшы пастаўкі на НПЗ да 2 млн тон нафты штомесяц.
Расея спыніла пастаўкі нафты ў Беларусь. Што здарылася
- 1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
- Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
- Прыняты толькі «індыкатыўны балянс»: Расея можа паставіць 24 млн тонаў нафты на год. У 2019-м столькі і паставілі: 18 млн т пайшлі на перапрацоўку, яшчэ 6 млн т на «перамытненьне». Паводле эканаміста Яраслава Раманчука, Беларусі на ўласныя патрэбы хапае 6–7 млн тонаў — астатняе ішло на нафтапрадукты для экспарту або на «перамытненьне».
- 31 сьнежня 2019 году Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
- Пакуль Мазырскі НПЗ пачаў атрымліваць нафту толькі ад кампаніі расейскага алігарха Гуцэрыева — чакаецца пастаўка ўсяго 750 тысячаў тонаў.
- Беларусь дамовілася пра імпарт 80 тонаў нарвэскай нафты Johan Sverdrup з пастаўкай у літоўскі порт Клайпеда. У Беларусі чакаюць пачатку разгрузкі ўвечары 22 студзеня. Перавалка і транспарт да НПЗ чыгункай будуць каштаваць больш за 20 даляраў за тону.
- Гатоўнасьць транспартаваць нафту ў Беларусь на пастаяннай аснове ўжо выказалі суседнія Латвія (магчымыя аб’ёмы не абвяшчаліся) і Літва (да 3 млн тонаў на год). Пры чым Літва гатовая дастаўляць і газ. Па стане на 21 студзеня «Белнафтахім» мае «практычна гатовыя кантракты» на альтэрнатыўныя пастаўкі.
- Беларускія НПЗ у першай палове студзеня працавалі на леташніх запасах, аб’ёму якіх хапала прыкладна на 20 дзён працы. Экспарт нафтапрадуктаў Беларусь часова прыпыняла ад 1 студзеня, аднавіла ад 21-га.
- Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
- Публічна ж Лукашэнка 21 студзеня паставіў задачу зьнізіць пастаўкі нафты з Расеі да 30-40% ад неабходных аб’ёмаў: «працэнтаў 30 мы павінны з Балтыкі завозіць і працэнтаў 30 праз Украіну». Пастаўкі з Казахстану, заявіў ён, заблякавала Расея.
- Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт-2020 закладзеныя страты ў памеры 951 млн рублёў.
- Расея дагэтуль не кампэнсавала Беларусі страты за пастаўкі бруднай нафты ў красавіку 2019 году — толькі 20 студзеня 2020-га дамовіліся пра падыходы і мэтодыку кампэнсацыі.
Беларусь — адзіная краіна ў сьвеце, якая багацее на суседзкай нафце, — эканаміст
Усё пачалося з Пуціна. Кароткая гісторыя нафтагазавых канфліктаў Беларусі і Расеі
Ці ўратуе Беларусь эўрапейская нафта? Разьбіраемся з экспэртамі