Студэнты Горацкай сельскагаспадарчай акадэміі расказалі Свабодзе, ці баяцца каранавірусу, як ставяцца да захадаў прафіляктыкі, чаго не хапае і як бараніцца.
Каранавірус у Беларусі і ў сьвеце. Як разьвіваюцца падзеі >>
Горацкая сельскагаспадарчая акадэмія (Магілёўская вобласьць) — адна з найвялікшых навучальных устаноў Беларусі. Тут вучацца блізу 10 тысяч студэнтаў. У 1985 годзе яе скончыў па спэцыяльнасьці «эканаміст-арганізатар сельскагаспадарчай вытворчасьці» Аляксандар Лукашэнка.
«Мыць часьцей рукі і захоўваць дыстанцыю...»
Студэнты на згадку пра небясьпеку ад каранавірусу аджартоўваюцца «наказамі бацькі», што «вірус труцяць 40–50 грамамі гарэлкі», а калі што якое, дык іх «вылечыць трактар», калі пачнецца практыка. Маладыя людзі лічаць, што «падчапіць» хваробу ім няма дзе, бо ў аўдыторыях і інтэрнаце рэгулярна праводзіцца дэзінфэкцыя.
«Нам раяць часьцей мыць рукі, не зьбірацца вялікімі кампаніямі і захоўваць мэтровую дыстанцыю падчас гутаркі», — пералічваюць рэкамэндацыі акадэмічнай адміністрацыі трое студэнтаў, ідучы з заняткаў.
Аб’ява на ўваходзе ў адну з горацкіх паліклінік
На пытаньне, ці ставяцца да такіх парадаў сур’ёзна, студэнты рэагуюць сьмехам. «Некалькі дзясяткаў афіцыйна агучаных выпадкаў хваробы» яны «не ўспрымаюць як надыход маштабнай эпідэміі».
Маладзёны адзначаюць, што толькі адзінкі ў акадэміі ходзяць у мэдычных масках.
Студэнткі: маска справакуе паніку
Наступныя суразмоўніцы, студэнткі, упэўненыя, што маскі трэба насіць, калі чалавек ужо захварэў. Калі ж здаровы, то «ад іх няма толку». Дзяўчаты мяркуюць, што калі хадзіць у масцы, людзі навокал будуць панікаваць.
«Яны будуць успрымаць, што чалавек заразны, будуць цурацца яго. А гэта дужа непрыемна», — кажуць яны.
Горацкія студэнты ідуць з заняткаў
Суразмоўніцы адзначаюць, што ў мясцовых аптэках маскі хутка разьбіраюць, а «невялікія пузыркі» антысэптыку занадта дарагія для студэнтаў. Не хаваюць, што каранавірусу баяцца.
Спосабы засьцерагчыся называюць тыя самыя: часта мыць рукі, пазьбягаць вялікіх кампаній і захоўваць дыстанцыю. Дадаюць, што ў акадэміі на лекцыях вялікія групы «разьбіваюць», каб было менш за 30 чалавек. Працягласьць лекцый скарацілі да 30 хвілін.
У акадэмічным гарадку
У мясцовых аптэках запэўнілі: усё, што трэба для прафіляктыкі, у продажы ёсьць. «25 сакавіка прывезьлі шмат антысэптычных шматразовых масак па 1,95. Хопіць усім», — сказалі ў аптэцы, што непадалёк ад акадэмічнага гарадка. Танных аднаразовых масак у продажы няма.
ГЛЯДЗІЦЕ ТАКСАМА: Чаму Беларусь засталася бяз танных аднаразовых масак? Расьсьледаваньне Свабоды
Студэнты з Кітаю ведаюць, што такое беларускі карантын
Каб пабачыць студэнтаў у масках, давялося нямала пахадзіць па акадэмічным гарадку. На ўваходзе ў адну зь мясцовых паліклінік аб’ява нагадвае: хворым на прастуду неабходна прыходзіць у мэдычных масках«. У дужках дададзена: «Студэнты не выключэньне».
«Мы хадзілі ў бальніцу, таму давялося начапіць маску, — кажа студэнт з Туркмэністану. — Але, прызнаюся, я ня ведаю, ці ёсьць небясьпека захварэць на каранавірус тут у Горках. Па людзях глядзіш — усе спакойныя. Ходзяць як нічога ніякага. Нас гэта супакойвае».
Уваход у акадэмічны гарадок
Студэнты з Кітаю — адзіныя ў акадэміі, хто прайшоў карантын па вяртаньні з вакацый у лютым. Тэставаньне ня выявіла ў 13 іншаземцаў каранавірусу, але іх усё адно зьмясьцілі ў адмысловы блёк, дзе стварылі ўмовы карантыну з улікам інкубацыйнага пэрыяду для COVID-19.
Па словах студэнтаў з Кітаю, у ізаляцыі яны прабылі два тыдні. На ўмовы карантыну не наракаюць. На вуліцы ходзяць у масках.
«Няёмкасьці не адчуваю, — кажа адна з замежніц. — Да маскі я прывыкла, і яна мне не перашкаджае...»
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ