Суды ў анэксаваным Расеяй Крыме ў чацьвер, 5 сакавіка, вынесьлі прысуды двум членам рэлігійнай арганізацыі Сьведкі Яговы.
Суд у Джанкоі прысудзіў мясцоваму жыхару Сяргею Філатаву шэсьць гадоў пазбаўленьня волі з адбываньнем пакараньня ў калёніі агульнага рэжыму. Пра гэта паведамляюць «Крым. Реалии са спасылкай» на грамадзкае аб’яднаньне «Крымская салідарнасьць».
ГЛЯДЗІЦЕ ТАКСАМА: «У Беларусі быць сьведкам Яговы не злачынства». У Расею вернікі стараюцца ня езьдзіць
Сяргея Філатава прызналі вінаватым у арганізацыі дзейнасьці экстрэмісцкай арганізацыі. Расейскі Вярхоўны суд у 2017 годзе прызнаў рэлігійную арганізацыю Сьведкі Яговы экстрэмісцкай і забараніў яе дзейнасьць у Расеі. Філатава забралі ў СІЗА проста з будынка суду.
Пракуратура прасіла для яго 7 гадоў калёніі. Філатаў — бацька чацьвярых дзяцей, ён, як сьцьвярджаецца, пераехаў у Крым з Херсону ў сувязі з тым, што трэба было даглядаць хворую дачку.
ГЛЯДЗІЦЕ ТАКСАМА: У Хабараўску Сьведку Яговы асудзілі за гутаркі пра «ўмацаваньне сям’і»
У Ялце ў той жа дзень суд аштрафаваў сьведку Яговы Арцёма Герасімава на 400 тысяч рублёў.
Герасімава прызналі вінаватым праз тое ж абвінавачаньне — у арганізацыі дзейнасьці экстрэмісцкай арганізацыі. Пракуратура прасіла для яго рэальны тэрмін — 6,5 года пазбаўленьня волі.
ГЛЯДЗІЦЕ ТАКСАМА: «У Беларусі быць сьведкам Яговы не злачынства». У Расею вернікі стараюцца ня езьдзіць
Сьведкі Яговы ў Расеі рэгулярна зазнаюць крымінальны перасьлед. Праваабарончы цэнтар «Мэмарыял» прызнае іх палітвязьнямі. Рэпрэсіі супраць вернікаў неаднаразова асуджалі Злучаныя Штаты.
- Дзясяткі людзей былі асуджаныя ў Крыме паводле абвінавачваньня ва ўдзеле ў дзейнасьці мусульманскай арганізацыі «Хізб-ут-Тахрыр», якая ў Расеі прызнана тэрарыстычнай. Ні «Хізб-ут-Тахрыр», ні Сьведкі Яговы не забароненыя ва Ўкраіне.
У што вераць Сьведкі Яговы
- Бог. Сьведкі Яговы вераць у адзінага праўдзівага і ўсёмагутнага Бога, чыё імя — Ягова.
- Біблія. Сьведкі Яговы вераць, што Біблія — гэта слова Бога. Яны засноўваюць усе свае вучэньні на 66 кананічных кнігах Бібліі. Пры гэтым яны прызнаюць, што частка Бібліі напісана вобразнай мовай і не павінна разумецца літаральна.
- Ісус Хрыстос. Яны вераць у тое, што Ісус Хрыстос — гэта Збаўца і Сын Бога, але лічаць, што вучэньне пра Тройцу не заснаванае на Сьвятым Пісаньні.
- Царства Бога. Яны вераць у тое, што адзіная надзея чалавецтва — Царства Бога як нябесны ўрад, які ў хуткім часе зьнішчыць сучасны парадак у сьвеце, у тым ліку ўсе чалавечыя ўрады, і створыць новы парадак, у якім будуць жыць толькі праведныя людзі.
- Збавеньне. Пазбаўленьне ад граху магчымае дзякуючы ахвяры Ісуса Хрыста. Для гэтага трэба верыць у Хрыста і хрысьціцца. Аднак збавеньне немагчыма заслужыць, яго можна атрымаць толькі дзякуючы Божай дабрыні.
- Нябёсы. Адносна невялікая колькасьць людзей, 144 000, уваскрэснуць для жыцьця нябеснага, каб кіраваць разам з Ісусам Хрыстом у Царстве Бога.
- Зямля. Сьведкі Яговы вераць, што Бог падорыць паслухмяным яму людзям дасканалае здароўе і вечнае жыцьцё ў раі на зямлі.
- Зло і пакуты. Паводле Сьведак Яговы, зло і пакуты зьявіліся, калі адзін з анёлаў паўстаў супраць Бога. Гэты былы анёл пасьля бунту быў названы Сатаной і Д’яблам. Ён спакусіў Адама і Еву, што мела для людзей жахлівыя наступствы.
- Сьмерць. Калі чалавек памірае, ён перастае існаваць. Бог не катуе людзей у пекле. Бог верне людзей да жыцьця праз уваскрашэньне. Тыя, хто пасьля ўваскрашэньня адмовіцца вучыцца Божым шляхам, будуць назаўжды зьнішчаныя.
- Сям’я. Сям’я разглядаецца як саюз аднаго мужчыны і адной жанчыны, а развод лічыцца дапушчальным толькі ў выпадку сэксуальнай здрады мужа ці жонкі.
- Пакланеньне Богу. Сьведкі Яговы не ўшаноўваюць крыж ды іншыя выявы. Сярод іх формаў пакланеньня Богу — малітва, чытаньне і вывучэньне Бібліі, дапамога бедным і пацярпелым ад стыхійных бедзтваў.
- Арганізацыя. Сьведкі Яговы аб’яднаныя ў сходы, кожны зь якіх мае раду старэйшын. Аднак старэйшыны не атрымліваюць платы і не зьяўляюцца духавенствам. Дзейнасьць падтрымліваецца добраахвотнымі ахвяраваньнямі, якія робяцца ананімна.
- Адзінства. Сьведкі Яговы дэкляруюць, што робяць усё магчымае, каб сярод іх не было сацыяльных, этнічных, расавых ці клясавых падзелаў.
- Паводзіны. Сьведкі Яговы кажуць пра павагу да законаў любой краіны, калі тыя не пярэчаць законам Бога. Сярод забароненых Богам рэчаў яны называюць пераліваньне крыві. Сьведкі Яговы імкнуцца да міру і ня ўдзельнічаюць у войнах.
- Адносіны зь іншымі. Сьведкі Яговы спрабуюцца заставацца нэўтральнымі ў палітычных пытаньнях.
Паводле афіцыйнага сайту Сьведак Яговы