Дзіцячы госьпіс у Горадні вырашыў сам зарабляць грошы для хворых дзяцей і прапанаваў іншым людзям пераходзіць на новыя формы дабрачыннасьці. Незвычайная падзея адбылася 3 сакавіка.
Госьпіс зладзіў арт-галерэю аднаго дня. Падчас яе прэзэнтавалі адзеньне ад брэнду «Коска». Гэта праект госьпісу, які неўзабаве стане камэрцыйным. Грошы ад продажу адзеньня пойдуць на патрэбы хворых дзяцей.
Адзеньне ад госьпісу
Да таго ж падчас імпрэзы прэзэнтавалі новы лягатып госьпісу з выкарыстаньнем абрысаў старых цагляных горадзенскіх дамкоў. У лягатыпе ёсьць адсылка да герба «Калюмны» і да кароны, бо Горадню называюць каралеўскім горадам. На новай лінейцы адзеньня ёсьць гэты лягатып. Ягоны аўтар — Ігар Варкулевіч.
Новы лягатып госьпісу
Падчас імпрэзы ў інтэрактыўны рух запрашалі наведнікаў
Прэзэнтацыя новай лінейкі адзеньня ад госьпісу
Калекцыю адзеньня прэзэнтавалі танцоры ў кашулях з гэтым лягатыпам. Яны ўцягвалі ў інтэракцыю прысутных.
Піяніст Аляксей Пятроў сыграў невялікі канцэрт для прысутных.
Аляксей Пятроў
На канцэрце
Ірына Варкулевіч, каардынатарка імпрэзы
Усё ладзілася ў нядаўна адрэстаўраваным будынку, якому 130 гадоў. Там раней працаваў першы ў Горадні госьпіс пры фарным касьцёле, пазьней у ім жыў лекар. Архітэктары лічаць, што рэканструкцыя ў будынку праведзена дбайна і якасна. Цяпер ён будзе выкарыстоўвацца як офісны цэнтар.
Сэлфі на фоне старадаўніх сьценаў
Госьці фатаграфаваліся каля старых дзьвярэй, якія пасьля рэканструкцыі ня выкінулі, а выкарысталі як элемэнт дэкору
Старыя сходы не мянялі, а рэканструявалі
Як патлумачыла дырэктарка Горадзенскага дзіцячага госьпісу імя сьвятога Губэрта Вольга Вялічка, яны паспрабавалі зрабіць нестандартны фармат для Горадні.
Вольга Вялічка
«Мы хацелі паказаць, што дабрачыннасьць павінна ўскладняцца і абʼядноўваць рэсурсы. Ня так, што мы сабралі грошы і адправілі адно дзіця лячыцца за мяжу. Мы бы хацелі паказаць, што дабрачыннасьць павінна грунтавацца на патрэбах, якія ёсьць сёньня ў Горадні, і разьвіваць тыя рэсурсы, якіх нам не хапае», — адзначыла Вольга Вялічка.
Па словах кіраўніцы госьпісу, у іх атрымалася абʼяднаць рэсурсы, каб стварыць добрую культурную і дабрачынную падзею, якая ў выніку прынесла карысьць госьпісу, уласьнікам адноўленага будынка, дзе адбывалася прэзэнтацыя, і ўдзельнікам імпрэзы.
ГЛЯДЗІЦЕ ТАКСАМА: Як бацькі немаўлятак са СМА зьбіраюць грошы на самыя дарагія лекі ў сьвеце ГЛЯДЗІЦЕ ТАКСАМА: Горадзенскі дзіцячы госьпіс увёў унікальныя паслугі для дарослых. За ахвяраваньні ГЛЯДЗІЦЕ ТАКСАМА: Чаму дзіцячы госьпіс ня можа аплаціць унікальныя для Беларусі працэдуры для цяжка хворых дзяцей?