Ад недахопу нафтапрадуктаў беларускія сеткі аўтазаправачных станцый, якія належаць расейскім кампаніям, хочуць закупляць паліва ў суседніх краінах, паведамляе агенцтва Reuters.
Цяпер на раздробным рынку Беларусі працуюць «Лукойл», «Газпромнефть», «Роснефть» і «Татнефть». Сумарна яны валодаюць каля 20% ад агульнай колькасьці АЗС у Беларусі.
АЗС расейскай сеткі "Газпромнефть"
Расейскія кампаніі, зацікаўленыя ў разьмяшчэньні аўтазаправачных сетак у Беларусі, ня могуць забясьпечваць свае АЗС расейскімі нафтапрадукатамі — забарона на такія пастаўкі была ўведзена Масквой у 2018 годзе. Просьбы дазволіць часовы імпарт нафтапрадуктаў у Беларусь з Расеі атрымалі адмову, а «Белнафтахім» нібыта абмежаваны ў рэсурсах.
У «Газпромнефти» агенцтву расказалі, што сетка АЗС кампаніі сутыкнулася з абмежаваньнямі аптовых продажаў бэнзіну і дызпаліва з боку канцэрну «Белнафтахім». У адказ кампанія вырашыла наладзіць пастаўкі з-за мяжы — з Польшчы або краінаў Балтыі. Штомесяц запраўкам «Газпромнефти» патрабуецца да 5 тысяч тон аўтабэнзіну і 20 тысяч тон дызэльнага паліва.
ГЛЯДЗІЦЕ ТАКСАМА: Кампанія Гуцэрыева паставіць паліва для расейскіх заправак у БеларусіРаней СМІ паведамілі, што некаторыя запраўкі «Лукойлу» ўвялі абмежаваньні на рэалізацыю дызпаліва, але неўзабаве ліміты былі знятыя. У прадстаўніцтве «Лукойл-Беларусь» кажуць, што сёньня дэфіцыту паліва іхныя АЗС не адчуваюць.
У «Белнафтахіме» заявілі аб «нэрвознасьці» расейскіх калегаў
У офісе «Белнафтахіму» праблемы з пастаўкамі на ўнутраны рынак адмаўляюць. Прадстаўнік канцэрну Аляксандар Цішчанка ў размове са Свабодай запэўніў, што заводы вырабляюць дастаткова паліва, а кампаніі забясьпечваюцца ў адпаведнасці зь іх запатрабаваньнямі.
Паводле Цішчанкі, канцэрн прапаноўваў мацярынскім кампаніям расейскіх прадстаўніцтваў супрацу паводле давальніцкіх схемаў (каб расейскія кампаніі завозілі нафту ў Беларусь, а беларускія заводы з той нафты рабілі паліва для расейскіх заправак), але паразуменьня бакі не знайшлі.
Што да «нэрвознасьці» расейскіх калегаў, то спадар Цішчанка сьпісвае гэта на складанасьці перамоўнага працэсу аб энэргарэсурсах.
АЗС расейскай сеткі "Татнефть"
З прычыны канфлікту паміж Масквой і Менскам адносна цэнаў на нафту адзінымі пастаўшчыком расейскай сыравіны ў Беларусь ад пачатку году застаюцца кампаніі групы «Сафмар» Міхаіла Гуцэрыева. Гэтых аб’ёмаў недастаткова для загрузкі НПЗ у Мазыры і Наваполацку, што правакуе чаканьне паліўнага дэфіцыту.
Расея спыніла пастаўкі нафты ў Беларусь. Што здарылася
- 1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
- Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
- Прыняты толькі «індыкатыўны балянс»: Расея можа паставіць 24 млн тонаў нафты на год. У 2019-м столькі і паставілі: 18 млн т пайшлі на перапрацоўку, яшчэ 6 млн т на «перамытненьне». Паводле эканаміста Яраслава Раманчука, Беларусі на ўласныя патрэбы хапае 6–7 млн тонаў — астатняе ішло на нафтапрадукты для экспарту або на «перамытненьне».
- 31 сьнежня 2019 году Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
- Пакуль Мазырскі НПЗ пачаў атрымліваць нафту толькі ад кампаніі расейскага алігарха Гуцэрыева — чакаецца пастаўка ўсяго 750 тысячаў тонаў.
- Беларусь дамовілася пра імпарт 80 тонаў нарвэскай нафты Johan Sverdrup з пастаўкай у літоўскі порт Клайпеда. У Беларусі чакаюць пачатку разгрузкі ўвечары 22 студзеня. Перавалка і транспарт да НПЗ чыгункай будуць каштаваць больш за 20 даляраў за тону.
- Гатоўнасьць транспартаваць нафту ў Беларусь на пастаяннай аснове ўжо выказалі суседнія Латвія (магчымыя аб’ёмы не абвяшчаліся) і Літва (да 3 млн тонаў на год). Пры чым Літва гатовая дастаўляць і газ. Па стане на 21 студзеня «Белнафтахім» мае «практычна гатовыя кантракты» на альтэрнатыўныя пастаўкі.
- Беларускія НПЗ у першай палове студзеня працавалі на леташніх запасах, аб’ёму якіх хапала прыкладна на 20 дзён працы. Экспарт нафтапрадуктаў Беларусь часова прыпыняла ад 1 студзеня, аднавіла ад 21-га.
- Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
- Публічна ж Лукашэнка 21 студзеня паставіў задачу зьнізіць пастаўкі нафты з Расеі да 30-40% ад неабходных аб’ёмаў: «працэнтаў 30 мы павінны з Балтыкі завозіць і працэнтаў 30 праз Украіну». Пастаўкі з Казахстану, заявіў ён, заблякавала Расея.
- Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт-2020 закладзеныя страты ў памеры 951 млн рублёў.
- Расея дагэтуль не кампэнсавала Беларусі страты за пастаўкі бруднай нафты ў красавіку 2019 году — толькі 20 студзеня 2020-га дамовіліся пра падыходы і мэтодыку кампэнсацыі.
Беларусь — адзіная краіна ў сьвеце, якая багацее на суседзкай нафце, — эканаміст
Усё пачалося з Пуціна. Кароткая гісторыя нафтагазавых канфліктаў Беларусі і Расеі
Ці ўратуе Беларусь эўрапейская нафта? Разьбіраемся з экспэртамі