У Дзяржаўным камітэце вайсковай прамысловасьці Беларусі зьняпраўдзілі прэтэнзіі прадстаўніка расейскага вытворцы зброі, які абвінаваціў беларусаў у вырабе снайпэрскай вінтоўкі з выкарыстаньнем патэнтаваных расейскіх элемэнтаў.
«Інфармацыя пра вінтоўку дакладная, але фатаздымак быў амаль гадавой даўнасьці. Гэта ўжо іншая вінтоўка», — сказаў Свабодзе афіцыйны прадстаўнік Дзяржкамваенпраму Ўладзімер Лаўрынюк.
Паводле яго, днямі Дзяржкамваенпрам апублікуе падрабязны афіцыйны адказ на прэтэнзіі і прадставіць фатаздымкі цяперашняй снайпэрскай вінтоўкі SCR-TigerBY.
Сузаснавальнік расейскай кампаніі Sureshot Armament Group Валянцін Уласенка ў сваім фэйсбуку пракамэнтаваў інфармацыю з афіцыйнага сайта Мінабароны Беларусі пра распрацоўку вінтоўкі SCR-TigerBY. Інфармацыя была разьмешчаная разам з фатаздымкам, зробленым у траўні мінулага году на выставе ўзбраеньня і вайсковай тэхнікі Milex-2019 у Менску.
Вінтоўку распрацавалі ў ТАА «БСВТ — Новыя тэхналёгіі» (даччынае прадпрыемства спэцэкспартэра «Белспэцзьнештэхніка») на базе вядомай у СССР снайпэрскай вінтоўкі Драгунова (СВД). Валянцін Уласенка абвінаваціў беларусаў у частковым плягіяце. У якасьці доказу прывёў тое, што на фота беларускай вінтоўкі фігуруюць шасі і камплект прыкладу вытворчасьці ягонай кампаніі, якія запатэнтаваныя ў Расеі.
Неўзабаве пасьля гэтага камэнтару Мінабароны Беларусі зьняло з сайта інфармацыю пра распрацоўку снайпэрскай вінтоўкі «Тыгр». Чаму?
«На прадпрыемстве, дзе вырабляецца гэтая вінтоўка, зьнялі інфармацыю пра яе, таму і мы зьнялі сваю інфармацыю», — сказаў Свабодзе прэсавы сакратар галоўнага ўпраўленьня ідэалягічнай працы Міністэрства абароны Ўладзімер Макараў. Паводле яго, вінтоўку «Тыгр» прадставілі на выставе ўзбраеньня і вайсковай тэхнікі Milex-2019, якая летась прайшла ў Менску — і яна ня выклікала прэтэнзій.
Атрымаць камэнтар ад прадпрыемства «БСВТ — Новыя тэхналёгіі», дзе распрацавалі вінтоўку «Тыгр» не ўдалося. Афіцыйны прадстаўнік Дзяржкамваенпраму Ўладзімер Лаўрынюк сказаў Свабодзе, што Валянцін Уласенка не зьвяртаўся да беларускага распрацоўшчыка вінтоўкі з прэтэнзіямі.
«Летась у траўні на выставе ў Менску была прадэманстраваная вінтоўка ў адзіным экзэмпляры, фактычна гэта была канцэпцыя. З таго часу правялі вопытна-канструктарскую працу, цяпер у вінтоўкі зусім іншае шасі і прыклад. Нават візуальна яна значна адрозьніваецца ад той, што была на выставе», — сказаў Уладзімер Лаўрынюк.
ГЛЯДЗІЦЕ ТАКСАМА: 48 мільёнаў даляраў заробіць завод у Баранавічах на рамонце натаўскіх штурмавікоўДзе вырабляюцца беларускія «Тыгры»?
Паводле зьвестак незалежнага вайсковага экспэрта Аляксандра Алесіна, снайпэрскія вінтоўкі «Тыгр» вырабляюць на заводзе пад Воршай.
«Там прыкладна 150 чалавек працуе. Зьбіраюць „Тыгры“ з камплектуючых фактычна ўручную — і гэта самы дарагі складнік кошту. Мяркую, што гэтай вінтоўкай плянуецца ўзброіць падразьдзелы спэцыяльных сілаў, бо ранейшая вінтоўка СВД не забясьпечвала патрэбнай для іх дакладнасьці стральбы», — сказаў Аляксандар Алесін.
Аглядальнік таксама выказаўся пра тое, чаму маглі ўзьнікнуць прэтэнзіі да беларускага «Тыгра».
«Усім вядома, што калі зьбіраецца нейкая рэч з камплектуючых, але дадаецца шмат чаго і свайго, дык гэта ўжо арыгінальная рэч. Не выключаю, што прэтэнзіі расейцаў да нашых „Тыграў“ тлумачацца абвастрэньнем адносін паміж Расеяй і Беларусьсю», — мяркуе Аляксандар Алесін.
У прэсавай службе Мінабароны Свабодзе сказалі, што на ўзбраеньні беларускага войска снайпэрскіх вінтовак «Тыгр» няма.
ГЛЯДЗІЦЕ ТАКСАМА: «Лукашэнка пра гэта не падумаў». Экспэрт тлумачыць, як праверка баяздольнасьці беларускага войска супала зь візытам Пампэо ГЛЯДЗІЦЕ ТАКСАМА: Мала і дорага. Экспэрт пра пастаўку расейскіх зьнішчальнікаў Су-30СМ