Амаль 80% расейцаў лічаць прапанаваныя Ўладзімірам Пуціным папраўкі ў канстытуцыю важнымі. Найбольшую падтрымку выклікалі ініцыятывы ў індэксацыі пэнсій і фіксацыі мінімальнага заробку не ніжэй за пражытковы мінімум, паказала апытаньне Ўсерасейскага цэнтру вывучэньня грамадзкай думкі.
У рэспандэнтаў пыталі, як яны ставяцца да ўнясеньня тых ці іншых зьменаў у канстытуцыю і прапаноўвалі выбраць адзін з варыянтаў адказаў:
- хутчэй станоўча;
- хутчэй адмоўна;
- хутчэй абыякава;
- цяжка адказаць.
Найбольш падтрымалі ініцыятывы сацыяльнага характару, піша РБК. 91% грамадзян заявілі, што хутчэй станоўча ставяцца да прапановаў замацаваць у канстытуцыі абавязковую рэгулярную індэксацыю пэнсій, дапамог ды іншых сацыяльных выплат.
Далей па ўзроўні падтрымкі ідуць прапановы:
- павялічыць цэнз аселасьці для кандыдатаў на прэзыдэнта з 10 да 25 гадоў — 87% (хутчэй адмоўна ставяцца 5%);
- надзяліць канстытуцыйны суд функцыяй праверкі законапраектаў па запыце кіраўніка дзяржавы — 81% (супраць 4%);
- забараніць замежнае грамадзянства і пасьведчаньне на жыхарства ў іншай дзяржаве для губэрнатараў, чальцоў ураду і іншых чыноўнікаў — 68% (хутчэй адмоўна 14%),
- права прэзыдэнта прызначаць кіраўнікоў сілавых структур і пракурораў рэгіёнаў пасьля кансультацый з Саветам Фэдэрацыі (хутчэй станоўча ацанілі 66%),
- выключыць з асноўнага закону слова «запар» у дачыненьні да тэрмінаў паўнамоцтваў прэзыдэнта (станоўча ацанілі 66%),
- усталяваць прыярытэт расейскай канстытуцыі над міжнароднымі дамовамі (63% ацанілі станоўча),
- 62% станоўча паставіліся да пашырэньня паўнамоцтваў Савета Фэдэрацыі,
- 61% — да прапановы даць Дзярждуме права зацьвярджаць старшыню ўраду, віцэ-прэм'ераў і міністраў.
Пуцін прапанаваў пераразьмеркаваць паўнамоцтвы паміж галінамі ўлады, надзяліць паўнамоцтвамі Дзяржсавет і дазволіць звальняць судзьдзяў Вярхоўнага і Канстытуцыйнага судоў. Гэта самыя маштабныя палітычныя рэформы ў гісторыі Расеі пасьля прыняцьця Канстытуцыі ў 1993 годзе.
Многія экспэрты лічаць, што з дапамогай паправак Пуцін плянуе спрасьціць сабе захаваньне ўлады ў краіне пасьля завяршэньня яго прэзыдэнцкага тэрміну. У 2024 годзе Пуцін ня можа балятавацца ў прэзыдэнты Расеі ад таго, што Канстытуцыя забараняе яму займаць гэтую пасаду больш за два тэрміны запар.