Міністэрства юстыцыі ЗША чарговы раз апублікавала службовыя дакумэнты ФБР, якія ўключаюць допыты ключавых сьведак у справе аб імаверным умяшаньні Расеі ў амэрыканскія прэзыдэнцкія выбары 2016 году.
Расьсьледаваньне два гады вёў спэцыяльны пракурор Робэрт Мюлер. Дакумэнты аб’ёмам 356 старонак публікуюць тэлеканал CNN і сайт BuzzFeed.
У дакумэнтах, у прыватнасьці, зьмяшчаецца інфармацыя аб сустрэчы сына прэзыдэнта ЗША Дональда Трампа-малодшага з расейскім юрыстам Натальляй Весяльніцкай у гатэлі Trump Tower ў Нью-Ёрку ў чэрвені 2016 году. Паказаньні пра сустрэчу даў топ-мэнэджэр расейскага будаўнічага холдынгу Crocus Group Іраклі Кавэладзэ.
ГЛЯДЗІЦЕ ТАКСАМА: ЗША распрацоўваюць тактыку на выпадак умяшаньня Расеі ў выбары
Згодна з запісам ФБР, з просьбай наведаць сустрэчу да Кавэладзэ зьвярнуўся першы віцэ-прэзыдэнт групы кампаній Crocus Group. Паводле словаў Кавеладзэ, памочнік Агаларава паведаміў, што Весяльніцкая мае нэгатыўную інфармацыю аб суперніцы Трампа на выбарах Гілары Клінтан і гэта нібыта зьяўляецца тэмаю сустрэчы.
Кавэладзэ сказаў сьледчым, што ў Trump Tower прысутнічаў старэйшы дарадца і зяць прэзыдэнта ЗША Джарэд Кушнер. Паводле бізнэсмэна, Кушнер быў раздражнёны і не разумеў неабходнасьці сустрэчы. Дарадца, з словаў Кавэладзэ, адразу пасьля пачатку перамоваў пацікавіўся, ці маюць удзельнікі інфармацыю пра Клінтан.
Кавэладзэ заявіў, што час быў выдаткаваны марна.
ГЛЯДЗІЦЕ ТАКСАМА: Расея вяла кампанію дэзінфармацыі, каб перакласьці адказнасьць на ЎкраінуГЛЯДЗІЦЕ ТАКСАМА: Расея актыўна ўмешвалася ў выбары 2016 году, — справаздача Сэнату ЗША
Акрамя інфармацыі пра допыт Кавэладзэ, дакумэнты зьмяшчаюць запісы аб гутарках зь іншымі пэрсонамі з атачэньня прэзыдэнта ЗША.
Выданьне BuzzFeed зьвяртае ўвагу, што Міністэрства юстыцыі ЗША падало дакумэнты ў адрэдагаваным выглядзе.
- У ліпені 2017 году Трамп-малодшы апублікаваў электронныя лісты, зь якіх вынікае, што ён сустрэўся з Натальляй Весяльніцкай. Перад гэтым яму паведамілі, што яна валодае кампраматам на кандыдата ў прэзыдэнты ад дэмакратаў Гілары Клінтан.
- Сын прэзыдэнта ЗША адзначыў пасьля, што сустрэча не прынесла ніякай карысьці. Весяльніцкая адмаўляе наяўнасьць у яе дакумэнтаў, якія ганяць Клінтан.
- У сакавіку 2019 году каманда спэцпракурора Робэрта Мюлера завяршыла працу над дакладам пра меркаванае ўмяшаньні Расеі ў прэзыдэнцкія выбары 2016 году ў ЗША.
- Двухгадовае расьсьледаваньне даказала спробы Масквы паўплываць на амэрыканскі выбарчы працэс.
- Але сувязяў паміж перадвыбарным штабам Дональда Трампа і Крамлём сьледчыя не знайшлі.
- Пры гэтым Мюлер не прыйшоў да адназначнай высновы, ці спрабаваў Трамп перашкаджаць правасудзьдзю.
- Масква сваё дачыненьне да выбараў у іншых дзяржавах адмаўляе.